മനാമ: ബഹ്റൈനിൽ സാമൂഹിക വികസന മന്ത്രാലയത്തിന് കീഴിൽ 343 സിവിൽ അസോസിയേഷനുകൾ രജിസ്റ്റർ ചെയ്തതായി അധികൃതർ അറിയിച്ചു. ഇവയിൽ 91 ചാരിറ്റബിൾ സംഘടനകളും 40 പ്രൊഫഷണൽ ബോഡികളും 22 ക്ലബ്ബുകളും ഉൾപ്പെടുന്നു. ഭിന്നശേഷിക്കാർക്കായുള്ള 12 അസോസിയേഷനുകളും പത്ത് കോ-ഓപ്പറേറ്റീവ് സൊസൈറ്റികളും രജിസ്റ്റർ ചെയ്തിട്ടുണ്ട്. സിവിൽ അസോസിയേഷൻ മേഖലയെ നിയന്ത്രിക്കുന്നതിനുള്ള പുതിയ നിയമം പ്രാരംഭ പഠനഘട്ടത്തിലാണ്. അതുവരെ നിലവിലുള്ള നിയമപരമായ ചട്ടക്കൂട് തുടരുമെന്ന് അണ്ടർസെക്രട്ടറി സിയാദ് ആദിൽ ദർവിഷ് വ്യക്തമാക്കി. നിരവധി മലയാളി അസോസിയേഷനുകൾ ഈ മന്ത്രാലയത്തിന്റെ കീഴിൽ ഉണ്ട്. അസോസിയേഷനുകൾക്കും ക്ലബ്ബുകൾക്കും സ്വകാര്യ സ്ഥാപനങ്ങൾക്കുമായി 18 അധ്യായങ്ങളുള്ള മാർഗനിർദ്ദേശ മാനുവൽ തയ്യാറാക്കുന്നു. നിയമം അന്തിമമാക്കുന്നതിന് മുമ്പ് വിവിധ സംഘടനകളിൽ നിന്ന് അഭിപ്രായങ്ങൾ സ്വീകരിക്കുമെന്നും മന്ത്രാലയം അറിയിച്ചു.
