2026 മുതൽ CBSE പത്താം ക്ലാസ് വിദ്യാർഥികൾക്ക് രണ്ട് ബോർഡ് പരീക്ഷകൾ എഴുതാനുള്ള അവസരമാണ് ഒരുക്കിയിരിക്കുന്നത്. ആദ്യ ബോർഡ് പരീക്ഷ എല്ലാ വിദ്യാർഥികൾക്കും നിർബന്ധമാണ്. ആദ്യ പരീക്ഷയിൽ വിജയിക്കുന്നവർക്ക് പരമാവധി മൂന്ന് പ്രധാന വിഷയങ്ങളിൽ മാർക്ക് മെച്ചപ്പെടുത്തുന്നതിനായി രണ്ടാം പരീക്ഷ എഴുതാം.
ആദ്യ പരീക്ഷയിൽ മൂന്ന് വിഷയങ്ങളിലോ അതിലധികമോ പരീക്ഷ എഴുതാത്ത വിദ്യാർഥികൾക്ക് രണ്ടാം ബോർഡ് പരീക്ഷ എഴുതാൻ സാധിക്കില്ല. ഇവരെ അടുത്ത വർഷത്തെ പ്രധാന പരീക്ഷയിൽ ‘Essential Repeat’ വിഭാഗത്തിൽ ഉൾപ്പെടുത്തും. അതേസമയം, ആദ്യ പരീക്ഷയിൽ കമ്പാർട്ട്മെന്റ് ലഭിക്കുന്ന വിദ്യാർഥികൾക്ക് രണ്ടാം പരീക്ഷയിൽ കമ്പാർട്ട്മെന്റ് വിഭാഗത്തിൽ പങ്കെടുക്കാം.
ക്ലാസ് 10ൽ വിജയിക്കാൻ നിലവിലുള്ള പാസ് മാനദണ്ഡങ്ങൾ തുടരും. സാധാരണയായി ഓരോ വിഷയത്തിലും 33 ശതമാനം മാർക്ക് നേടേണ്ടതുണ്ട്; ചില വിഷയങ്ങളിൽ തിയറി, ഇന്റേണൽ അസസ്മെന്റ്/പ്രോജക്ട് എന്നിവയ്ക്കുള്ള പ്രത്യേക മാനദണ്ഡങ്ങളും ബാധകമാണ്.
രണ്ട് പരീക്ഷാ സംവിധാനത്തിലൂടെ ആദ്യ അവസരത്തിൽ തന്നെ മികച്ച പ്രകടനം നടത്താനും ആവശ്യമെങ്കിൽ മാർക്ക് മെച്ചപ്പെടുത്താനും വിദ്യാർഥികൾക്ക് അവസരം ലഭിക്കും. എന്നാൽ രണ്ടാം പരീക്ഷയെ ആശ്രയിക്കുന്നതിന് മുമ്പ് CBSE നിർദേശിച്ചിരിക്കുന്ന യോഗ്യതാ മാനദണ്ഡങ്ങൾ വിദ്യാർഥികൾ ശ്രദ്ധിക്കേണ്ടതാണ്.
