ജൂനിയർ എൻടിആറും ജാൻവി കപൂറും അഭിനയിച്ച ദേവര: പാർട്ട് 1 സിനിമയിലെ ‘ചുട്ടമല്ലേ’ ഗാനത്തിന്റെ ദൃശ്യങ്ങൾ ഉപയോഗിച്ച് തയ്യാറാക്കിയ AI ഡീപ്ഫേക്ക് വീഡിയോ വിവാദത്തിൽ പ്രതികരണവുമായി നടൻ വിജയ് ദേവരകൊണ്ട. വീഡിയോക്കെതിരെ രംഗത്തെത്തിയ ജൂനിയർ എൻടിആറിന്റെ പ്രതികരണം പങ്കുവെച്ചുകൊണ്ടാണ് വിജയ് ദേവരകൊണ്ട ശക്തമായ നിലപാട് അറിയിച്ചത്.
AI സാങ്കേതികവിദ്യ ദുരുപയോഗം ചെയ്ത് ഒരാളുടെ രൂപവും ദൃശ്യങ്ങളും മോശമായ രീതിയിൽ മാറ്റുന്നത് അംഗീകരിക്കാനാകില്ലെന്ന് വിജയ് ദേവരകൊണ്ട പറഞ്ഞു. ഇത്തരം പ്രവൃത്തികൾ ചെയ്യുന്നവർക്കെതിരെ കർശനമായ നിയമനടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.
സമൂഹം എങ്ങോട്ടാണ് പോകുന്നതെന്നും മറ്റൊരാളെ അപമാനിക്കുന്നതിൽ ചിലർ എങ്ങനെ സന്തോഷം കണ്ടെത്തുന്നുവെന്നും താരം ചോദിച്ചു. AI മനുഷ്യരുടെ തൊഴിൽ നഷ്ടപ്പെടുത്തുമോ എന്നതിനെക്കുറിച്ച് ലോകമെമ്പാടും ചർച്ച നടക്കുമ്പോൾ, അതേ സാങ്കേതികവിദ്യ ഇത്തരം ദുരുപയോഗങ്ങൾക്ക് ഉപയോഗിക്കുന്നത് ആശങ്കാജനകമാണെന്നും അദ്ദേഹം ചൂണ്ടിക്കാട്ടി.
വിജയ് ദേവരകൊണ്ടയുടെ ഏറ്റവും ശക്തമായ പ്രതികരണം ഡീപ്ഫേക്ക് ഉള്ളടക്കത്തെ “ഡിജിറ്റൽ ലൈംഗിക അതിക്രമത്തിന് തുല്യം” എന്ന് വിശേഷിപ്പിച്ചതാണ്. ഇത്തരം പ്രവൃത്തികളെ നിയമം വളരെ ഗൗരവത്തോടെ കാണണമെന്നും അദ്ദേഹം ആവശ്യപ്പെട്ടു. സംഭവത്തിനെതിരെ ശബ്ദമുയർത്തുന്നവർക്ക് പൂർണ പിന്തുണയും താരം അറിയിച്ചു.
ഇതിന് മുമ്പ് ജൂനിയർ എൻടിആറും വീഡിയോക്കെതിരെ ശക്തമായി രംഗത്തെത്തിയിരുന്നു. വീഡിയോയെ അപലപിച്ച അദ്ദേഹം അത് തയ്യാറാക്കിയവർക്കും പ്രചരിപ്പിച്ചവർക്കുമെതിരെ നിയമനടപടി സ്വീകരിക്കുമെന്ന് വ്യക്തമാക്കി. വീഡിയോ കാണുകയോ പങ്കുവെക്കുകയോ ചെയ്യരുതെന്നും അദ്ദേഹം പൊതുജനങ്ങളോട് ആവശ്യപ്പെട്ടു.
AI സാങ്കേതികവിദ്യയുടെ ദുരുപയോഗം തടയാൻ കേന്ദ്ര-സംസ്ഥാന സർക്കാരുകൾ കൂടുതൽ കർശനമായ നിയമങ്ങളും നിയന്ത്രണങ്ങളും കൊണ്ടുവരണമെന്നും ജൂനിയർ എൻടിആർ ആവശ്യപ്പെട്ടു.
