റിയാദ്: സൗദി അറേബ്യയില്‍ മിന്നല്‍ പ്രളയ മുന്നറിയിപ്പ്. സൗദിയുടെ ചില ഭാഗങ്ങളില്‍ ഇന്ന് മിന്നല്‍ പ്രളയത്തിന് കാരണമായേക്കാവുന്ന ശക്തമായ ഇടിമിന്നലോട് കൂടിയ മഴയ്ക്ക് സാധ്യതയുണ്ടെന്നാണ് നാഷണല്‍ സെന്റര്‍ ഫോര്‍ മെറ്റീരിയോളജിയുടെ മുന്നറിയിപ്പ്. സൗദിയുടെ ജസാന്‍, അസീര്‍, അല്‍-ബഹ, മക്ക, മദീന എന്നിവിടങ്ങളിലാണ് മുന്നറിയിപ്പുള്ളത്.
പലയിടങ്ങളിലും മഴയ്ക്കൊപ്പം ആലിപ്പഴ വീഴ്ചയ്ക്കും പൊടിക്കാറ്റിനും സാധ്യതയുണ്ട്. ഇതിനുപുറമെ തബൂക്ക്, അല്‍ ജൗഫ്, ഹാഇല്‍, ഖസീം, വടക്കന്‍ അതിര്‍ത്തി പ്രവിശ്യ എന്നിവിടങ്ങളില്‍ മിതമായ തോതിലുള്ള മഴ ലഭിച്ചേക്കാം. മഴ ശക്തമാകുന്ന മലയോര മേഖലകളിലും താഴ്‌വരകളിലും വെള്ളപ്പൊക്ക സാധ്യതയുള്ളതിനാല്‍ ജനങ്ങള്‍ ജാഗ്രത പാലിക്കണമെന്നും സുരക്ഷാ നിര്‍ദേശങ്ങള്‍ കൃത്യമായി പാലിക്കണമെന്നും അധികൃതര്‍ നിര്‍ദേശിച്ചു. തബൂക്ക്, അല്‍-ജൗഫ്, ഹായില്‍, അല്‍-ഖസീം, വടക്കന്‍ അതിര്‍ത്തി പ്രദേശങ്ങള്‍ എന്നിവിടങ്ങളുടെ ചില ഭാഗങ്ങളില്‍ നേരിയതോ മിതമായതോ ആയ ഇടിമിന്നലോട് കൂടിയ മഴയും പ്രവചിക്കപ്പെടുന്നുണ്ട്. നജ്റാന്റെ ചില ഭാഗങ്ങളെ പൊടിയും മണലും ഉയര്‍ത്തുന്ന ശക്തമായ കാറ്റ് ബാധിച്ചേക്കാം. കിഴക്കന്‍ പ്രവിശ്യയുടെയും മക്ക മേഖലയുടെയും തീരപ്രദേശങ്ങളില്‍ മൂടല്‍മഞ്ഞ് രൂപപ്പെട്ടേക്കാമെന്നും മുന്നറിയിപ്പുണ്ട്.
രാജ്യത്ത് ഏറ്റവും ഉയര്‍ന്ന താപനിലയായ 40 ഡിഗ്രി സെല്‍ഷ്യസ് മക്ക, മദീന, ദമ്മാം, ബുറൈദ എന്നിവിടങ്ങളില്‍ രേഖപ്പെടുത്തുമെന്നാണ് വിലയിരുത്തല്‍. തലസ്ഥാനമായ റിയാദില്‍ 39 ഡിഗ്രിയും അബഹയില്‍ 28 ഡിഗ്രിയുമായിരിക്കും താപനില. മോശം കാലാവസ്ഥയുള്ള സമയങ്ങളില്‍ താഴ്വരകളിലേക്ക് ഇറങ്ങരുതെന്നും യാത്രക്കാര്‍ അതീവ ശ്രദ്ധ പുലര്‍ത്തണമെന്നും സിവില്‍ ഡിഫന്‍സ് ഓര്‍മിപ്പിച്ചു.
