കൊല്ലം: ലഹരിവ്യാപനത്തിനെതിരെ സര്ക്കാര് സംവിധാനങ്ങളുടെ നേതൃത്വത്തില് നടപ്പാക്കുന്ന പ്രവര്ത്തനങ്ങളെ പിന്തുണയ്ക്കാന് പൊതുസമൂഹവും അണിനിരക്കണമെന്ന് ആഭ്യന്തര വകുപ്പ് മന്ത്രി രമേശ് ചെന്നിത്തല പറഞ്ഞു. തൂഫാന് ലഹരി പ്രതിരോധ ക്യാമ്പയിനിന്റെ ഭാഗമായി വിമലഹൃദയ ഗേള്സ് ഹയര് സെക്കന്ഡറി സ്കൂളില് സംഘടിപ്പിച്ച ‘തൂഫാനൊപ്പം എന്റെ വിദ്യാലയം’ പരിപാടിയുടെ ഉദ്ഘാടനം നിര്വഹിച്ചു സംസാരിക്കുകയായിരുന്നു അദ്ദേഹം.
ഓപ്പറേഷന് തൂഫാനിലൂടെ ഒരുമാസത്തിനുള്ളില് സംസ്ഥാനത്ത് 4500 ലഹരി കേസുകളെടുത്തു. 5600 പേരെ അറസ്റ്റ് ചെയ്തു. 40 കോടി രൂപയോളം വിലമതിക്കുന്ന ലഹരിവസ്തുക്കള് പൊലീസ് പിടിച്ചെടുത്തു. ലഹരി ഉപയോഗിക്കാന് പ്രേരിപ്പിക്കുന്നവര്ക്കും വില്ക്കുന്നവര്ക്കും വിലങ്ങ് വീഴുമെന്നും അദ്ദേഹം പറഞ്ഞു. രാസലഹരി, ഹൈബ്രിഡ് ലഹരിവസ്തുക്കള് എന്നിവയുടെ വ്യാപനം ചെറുക്കാന് നിരീക്ഷണസംവിധാനങ്ങള് കൂടുതല് ശക്തമാക്കും. ലഹരിവ്യാപനം തടയുന്നതിന് പ്രത്യേക പോലീസ് സംവിധാനം നടപ്പാക്കും. ഐജി റാങ്കിലുള്ള ഉദ്യോഗസ്ഥന്റെ മേല്നോട്ടത്തില് താഴെതട്ടുകളിലേക്കും സംവിധാനം വ്യാപിപ്പിക്കുമെന്നും അദ്ദേഹം വ്യക്തമാക്കി. കൂടാതെ, വിവിധ മാര്ഗങ്ങളിലൂടെനടത്തുന്ന ലഹരികടത്ത് ശക്തമായ നിരീക്ഷണ-എന്ഫോഴ്സ്മെന്റ് സംവിധാനങ്ങളിലൂടെ ഇല്ലാതാക്കും. യുവതലമുറയെ ലഹരി വിപത്തില്നിന്നും മോചിപ്പിക്കാന് നിരന്തരപ്രവര്ത്തനങ്ങള് ഉറപ്പാക്കുമെന്നും അദ്ദേഹം കൂട്ടിച്ചേര്ത്തു.
