ദോഹ : ഫാദർ അമീർ ഷെയ്ഖ് ഹമദ് ബിൻ ഖലീഫഅൽതാനിയുടെ വിയോഗത്തിൽ അനുശോചനം രേഖപ്പെടുത്തി ഖത്തറിലെ ഇന്ത്യൻ എംബസിയും വിവിധ പ്രവാസി സംഘടനകളും ചേർന്ന് അനുസ്മരണ യോഗം സംഘടിപ്പിച്ചു. ഖത്തറിന്റെ ആധുനികവൽക്കരണത്തിനും ഇന്ത്യയുമായുള്ള ഉഭയകക്ഷി ബന്ധം ശക്തമാക്കുന്നതിനും ഫാദർ അമീർ നൽകിയ സംഭാവനകളെ പ്രവാസി സമൂഹം യോഗത്തിൽ അനുസ്മരിച്ചു. ഖത്തറിനെ ഇന്നത്തെപ്പോലെ ആധുനികവും പുരോഗമനപരവും ആഗോളതലത്തിൽ ആദരിക്കപ്പെടുന്നതുമായ ഒരു രാജ്യമാക്കി മാറ്റുന്നതിൽ ഫാദർ അമീർ ഷെയ്ഖ് ഹമദ് ബിൻ ഖലീഫ അൽ ഥാനി നൽകിയ സംഭാവനകൾ വളരെ വലുതാണെന്ന് യോഗത്തെ അഭിസംബോധന ചെയ്ത് സംസാരിച്ച അംബാസഡർ വിപുൽ അനുസ്മരിച്ചു. അദ്ദേഹത്തിന്റെ ദീർഘവീക്ഷണത്തോടെയുള്ള നേതൃത്വമാണ് രാജ്യത്തിന്റെ സമഗ്രമായ വികസനത്തിനും അന്താരാഷ്ട്ര തലത്തിലുള്ള പ്രതിച്ഛായ ഉയർത്തുന്നതിനും കാരണമായതെന്നും അദ്ദേഹം അഭിപ്രായപ്പെട്ടു. ഫാദർ അമീറിന്റെ വിയോഗത്തിൽ ഖത്തറിലെ ഇന്ത്യൻ സമൂഹം എത്രത്തോളം ദുഃഖിക്കുന്നുവെന്നും, ഇരുരാജ്യങ്ങളും തമ്മിലുള്ള സൗഹൃദത്തിന് അദ്ദേഹം നൽകിയ സംഭാവനകൾ എത്ര വിലപ്പെട്ടതായിരുന്നുവെന്നും അടിവരയിടുന്നതായിരുന്നു അംബാസഡറുടെ വാക്കുകൾ.
ബുധനാഴ്ച ഐ.സി.സി അശോക ഹാളിൽ നടന്ന പരിപാടിയിൽ ഫസ്റ്റ് സെക്രട്ടറി ഡോ. വൈഭവ് താണ്ഡലെയും എംബസിക്ക് കീഴിലെ അപ്പെക്സ് ബോഡി നേതാക്കളും പങ്കെടുത്തു. ഇന്ത്യൻ കൾച്ചറൽ സെന്റർ (ICC) പ്രസിഡന്റ് എ.പി. മണികണ്ഠൻ, ഇന്ത്യൻ കമ്മ്യൂണിറ്റി ബെനവലന്റ് ഫോറം (ICBF) പ്രസിഡന്റ് ഷാനവാസ് ബാവ, ഇന്ത്യൻ സ്പോർട്സ് സെന്റർ (ISC) പ്രസിഡന്റ് ഇ.പി. അബ്ദുൾറഹ്മാൻ, ഇന്ത്യൻ ബിസിനസ് ആൻഡ് പ്രൊഫഷണൽസ് കൗൺസിൽ (IBPC) പ്രസിഡന്റ് താഹ മുഹമ്മദ് എന്നിവർ അനുശോചന സന്ദേശങ്ങൾ പങ്കുവെച്ചു.രാജ്യത്തിന്റെ പുരോഗതിക്കായി അദ്ദേഹം നൽകിയ മഹത്തായ സംഭാവനകളെയും പ്രവാസി സമൂഹത്തിന് നൽകിയ പിന്തുണയെയും നേതാക്കൾ ആദരവോടെ സ്മരിച്ചു.
