കൊച്ചി: സ്ത്രീ വിരുദ്ധ പരാമര്ശത്തില് ഉറച്ച്സമസ്ത നേതാവ് കാന്തപുരം എ പി അബൂബക്കര് മുസ്ലിയാര്. സ്ത്രീകളെ രംഗത്തിറക്കിയാല് വലിയ നാശമാണ് എന്ന് കണ്ടത് കൊണ്ടാണ് ഇസ്ലാം പര്ദ്ദ നിര്ബന്ധമാക്കിയതെന്ന് കാന്തപുരം പറഞ്ഞു. പെണ്ണുങ്ങള് വീട്ടില് അടങ്ങി ഒതുങ്ങി ജീവിക്കണം. അതാണ് ഖുര്ആന് പഠിപ്പിക്കുന്നത്. സ്ത്രീകള് പൊതു വേദിയില് ഇറങ്ങിയാല് വലിയ നാശമുണ്ടാകുമെന്നും കാന്തപുരം എ പി അബൂബക്കര് മുസ്ലിയാര് അഭിപ്രായപ്പെട്ടു.
‘സ്ത്രീകള് പൊതു വേദിയില് ഇറങ്ങരുത് എന്ന് പറയുന്നത് ബഹുമാനം കൊണ്ടാണ്. സ്ത്രീകള് പൊതു വേദിയില് ഇറങ്ങിയാല് അത് വലിയ നാശം. അതാണ് ഇസ്ലാം പര്ദ്ദ ഏര്പ്പെടുത്തിയത്. അതാണ് മതം പഠിപ്പിക്കുന്നത്. ആരെങ്കിലും ചോദ്യം ചെയ്താല് പേടിച്ച് ഓടില്ല. ഇത് പറയുമ്പോള് വേറെ ഏതെങ്കിലും സംഘടന കാന്തപുരത്തിന് എന്ത് അധികാരം എന്ന് ചോദിക്കുന്നു. ഞങ്ങള് മതത്തെ കുറിച്ച് പഠിച്ചവരാണ്. ഞങ്ങള്ക്ക് മുസ്ലിം സമുദായത്തോട് പറയാന് ഉള്ള അവകാശം ഉണ്ട്. പറയുക തന്നെ ചെയ്യും. ആരെങ്കിലും പറഞ്ഞാല് പേടിച്ച് ഓടില്ല’, കാന്തപുരം പറഞ്ഞു.
ഇസ്ലാമിക ആഘോഷങ്ങളില് സ്ത്രീകളെ പൊതുയിടങ്ങളില് പ്രദര്ശിപ്പിക്കരുതെന്ന വിവാദ നിര്ദേശവുമായി സമസ്ത കാന്തപുരം വിഭാഗം രംഗത്തെത്തിയത് വലിയ വിവാദമായിരുന്നു. അന്യപുരുഷന്മാര്ക്കിടയില് വേദിയിലോ പൊതുഇടങ്ങളിലോ സ്ത്രീകളെ കൊണ്ടുവരരുത്. ആഘോഷങ്ങള് അതിരുകടക്കുന്നത് തടയണമെന്നും കാന്തപുരം അബൂബക്കര് മുസ്ലിയാര് പുറത്തുവിട്ട പ്രസ്താവനയില് പറഞ്ഞിരുന്നു. നബിദിന ആഘോഷങ്ങളില് സ്ത്രീകളെ പങ്കെടുപ്പിച്ചതിന് പിന്നാലെ വിമര്ശനം ഉയര്ന്നതോടെയാണ് മഹല്ലുകള്ക്കും മദ്രസകള്ക്കും നിര്ദേശവുമായി സമസ്ത കാന്തപുരം വിഭാഗം രംഗത്തെത്തിയത്. ഇസ്ലാമിക ആഘോഷങ്ങള് അതിരുകടക്കരുതെന്നും ഇതിനായി മഹല്ല് നേതൃത്വം ജാഗ്രത പാലിക്കണമെന്നും കാന്തപുരം എ പി അബൂബക്കര് മുസ്ലിയാരുടെ പ്രസ്താവനയില് പറഞ്ഞിരുന്നു.
ഇസ്ലാമിക ആഘോഷങ്ങളും ചടങ്ങുകളും മതപരമായ അതിര്വരമ്പുകള് ലംഘിച്ച് മുന്നോട്ട് പോകുന്നത് ഗൗരവത്തോടെ കാണണം. ഇത്തരം പരിപാടികള് തികച്ചും ഇസ്ലാമിക മാനദണ്ഡങ്ങള് പാലിച്ചാണ് നടക്കുന്നതെന്ന് ഉറപ്പുവരുത്താന് മഹല്ല് ഭാരവാഹികളും പള്ളി, മദ്റസ, മറ്റ് സ്ഥാപനങ്ങള്, സംഘടനകള് എന്നിവരുടെ നേതൃത്വവും പ്രത്യേക ജാഗ്രത പുലര്ത്തണം.
പൊതുനിരത്തുകളിലും സ്റ്റേജുകളിലും അന്യപുരുഷന്മാര്ക്കിടയില് യുവതികളെ പ്രദര്ശിപ്പിക്കുന്നതും ഇസ്ലാമികമല്ലാത്ത ആചാരങ്ങളും ആഘോഷ രീതികളും കൂട്ടിയിണക്കുന്നതും വിശ്വാസികള്ക്ക് ചേര്ന്നതല്ലെന്നും അത് അനുവദനീയമല്ലെന്നും നേതാക്കള് ചൂണ്ടിക്കാട്ടി. മതകീയ മൂല്യങ്ങളും അച്ചടക്കവും കാത്തുസൂക്ഷിച്ചുകൊണ്ട മാത്രമായിരിക്കണം മഹല്ല് തലത്തിലും അല്ലാതെയും നടക്കുന്ന മുഴുവന് പരിപാടികളും സംഘടിപ്പിക്കേണ്ടത്. വരുതലമുറയിലേക്ക് സന്മാര്ഗീയമായ മാതൃകകള് പകര്ന്നു നല്കാന് എല്ലാവരും ബാധ്യസ്ഥരാണ്’ എന്നായിരുന്നു കാന്തപുരത്തിന്റെ പ്രസ്താവന.
ഖർഗെ പങ്കെടുത്ത വേദി ശുദ്ധീകരിച്ച സംഭവം; രാഹുല് ഗാന്ധിക്കെതിരെ കേസെടുത്ത് ഉത്തരാഖണ്ഡ് പൊലീസ്
ഡെറാഡൂണ്: ഹല്ദ്വാനിയിലെ ശുദ്ധീകരണ വിവാദത്തില് രാഹുല് ഗാന്ധിക്ക് എതിരെ കേസ് എടുത്ത് ഉത്തരാഖണ്ഡ് പൊലീസ്. വാല്മീകി സമുദായത്തില്പ്പെട്ട അമിത് കുമാര് നല്കിയ പരാതിയില് ആണ് കേസെടുത്തിരിക്കുന്നത്. മതപരമായ ചടങ്ങിന് രാഹുല് ഗാന്ധി ജാതീയമായ വ്യാഖ്യാനം നല്കിയെന്ന് ആരോപിച്ചാണ് കേസ്. ബിഎന്എസ് ലെ 196, 299 എസ്സി/എസ്ടി നിയമത്തിലെ 3 (1) (ക്യു) എന്നീ വകുപ്പുകള് പ്രകാരമാണ് കേസ്. ഖര്ഗെ പങ്കെടുത്ത വേദിയില് ശുദ്ധീകരണം നടത്തിയവര്ക്ക് എതിരെ കേസ് എടുക്കാന് പ്രധാനമന്ത്രിയോട് രാഹുല് ആവശ്യപ്പെട്ടിരുന്നു. എന്നാല് ഇതില് കോണ്ഗ്രസ് നല്കിയ പരാതിയില് ഇതുവരെ കോസ് എടുത്തിട്ടില്ല.
ഹല്ദ്വാനിയിലെ സ്ഥലവും പരിസരവും വൃത്തിയാക്കുന്നതിലും അനുഷ്ഠാനം നടത്തുന്നതിലും പട്ടികജാതി വിഭാഗത്തില്പ്പെട്ടവര് നേരിട്ട് പങ്കെടുത്തതായാണ് പരാതിക്കാരന് വ്യക്തമാക്കിയിരിക്കുന്നത്. വസ്തുതകള് മുന്കൂട്ടി പരിശോധിക്കാതെ ഈ സംഭവത്തെ ‘അയിത്തം’ എന്ന വിവേചനപരമായ പ്രവൃത്തിയായി ചിത്രീകരിച്ചതിലൂടെ, അതില് പങ്കെടുത്ത പട്ടികജാതി വിഭാഗക്കാരെ ജാതിവിവേചനം നടത്തുന്നവരായി തെറ്റായി വ്യാഖ്യാനിക്കുന്നതാണ് രാഹുല് ഗാന്ധിയുടെ പരാമര്ശങ്ങള് എന്നാണ് പരാതിക്കാരൻ്റെ ആരോപണം.
ഈ പ്രസ്താവനകള് വിവിധ സാമൂഹിക വിഭാഗങ്ങള്ക്കിടയില് ശത്രുതയും വിദ്വേഷവും വളര്ത്തുന്നതിനും, അതുവഴി ഇതില് ഉള്പ്പെട്ടവരുടെ വ്യക്തിപരമായ അന്തസ്സിനെയും സമാധാനത്തെയും സുരക്ഷയെയും ഗുരുതരമായി ബാധിക്കുന്നതിനും കാരണമായെന്നുമാണ് പരാതിക്കാരന്റെ വാദം. അതേസമയം, ജാതിപരമായ ലക്ഷ്യങ്ങളൊന്നും ഈ അനുഷ്ഠാനത്തിന് ഉണ്ടായിരുന്നില്ലെന്നും, പൊതുസ്ഥലത്തിന്റെ പരിശുദ്ധി വീണ്ടെടുക്കുക എന്ന ലക്ഷ്യത്തോടെ മാത്രമാണ് അത് നടത്തിയതെന്നുമായിരുന്നു ‘ശ്രീരാമസേന’ നല്കുന്ന വിശദീകരണം.
ഹല്ദ്വാനിയില് ഓഗസ്റ്റ് 8-ന് നടന്ന കോണ്ഗ്രസ് റാലിക്കുശേഷം അധ്യക്ഷന് ഖര്ഗെ സംസാരിച്ച വേദിയില് ‘ശ്രീരാമസേന’ എന്ന ഹിന്ദുത്വ സംഘടന നടത്തിയ ‘ശുദ്ധീകരണ യജ്ഞം’ (ശുദ്ധീകരണ ചടങ്ങ്) ദളിത് വിരുദ്ധമാണെന്നായിരുന്നു രാഹുല് ഗാന്ധി വിശേഷിപ്പിച്ചിരുന്നത്. ഓഗസ്റ്റ് 8-ന് ഹല്ദ്വാനിയിലെ രാംലീല മൈതാനിയില് ഇന്ത്യന് നാഷണല് കോണ്ഗ്രസ് ഒരു രാഷ്ട്രീയ റാലി സംഘടിപ്പിച്ചിരുന്നു. കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെയും മറ്റ് നേതാക്കളും ഇതില് പങ്കെടുത്തിരുന്നു.
റാലിക്ക് ശേഷം ഓഗസ്റ്റ് 11-ന്, പരാതിക്കാരനായ അമിത് കുമാര് ഉള്പ്പെടെയുള്ള പ്രാദേശിക സംഘടനാംഗങ്ങള് മൈതാനം പരിശോധിച്ചു. അവിടെ മാലിന്യങ്ങളും മദ്യക്കുപ്പികളും കണ്ടെത്തിയതിനെത്തുടര്ന്ന്, അവര് ശുചീകരണ പ്രവര്ത്തനങ്ങള് നടത്തുകയും ആ സാംസ്കാരിക കേന്ദ്രത്തിന്റെ പരിശുദ്ധി വീണ്ടെടുക്കുന്നതിനായി പരമ്പരാഗത ‘ഹവന് ശുദ്ധീകരണ’ ചടങ്ങ് നടത്തുകയും ചെയ്തു എന്നാണ് എഫ്ഐആറിൽ ചൂണ്ടിക്കാട്ടുന്നത്. തുടര്ന്ന് ഓഗസ്റ്റ് 29-ന് ന്യൂഡല്ഹിയില് നടന്ന പത്രസമ്മേളനത്തില്, ഈ ശുദ്ധീകരണ ചടങ്ങിനെ ‘അയിത്താചരണം’, ‘ദളിത് വിരുദ്ധ വിവേചനം’ എന്നിങ്ങനെ വിശേഷിപ്പിച്ച രാഹുല് ഗാന്ധി, ഇതില് പങ്കെടുത്തവര്ക്കെതിരെ നിയമനടപടി സ്വീകരിക്കണമെന്ന് ആവശ്യപ്പെടുകയുണ്ടായി. ഇതാണ് ഇപ്പോള് രാഹുല് ഗാന്ധിക്കെതിരായ പരാതിക്ക് കാരണം എന്ന ആരോപണവും ശക്തമാണ്.
