നിഷിൻ: ഏഷ്യൻ ഗെയിംസ് പുരുഷ ക്രിക്കറ്റിലെ ഏറെ പ്രതീക്ഷയോടെ കാത്തിരിക്കുന്ന ഇന്ത്യ–പാകിസ്ഥാൻ ഫൈനലിന് മഴ ഭീഷണി. ജപ്പാനിലെ നിഷിനിൽ ശനിയാഴ്ച നടക്കുന്ന മത്സരത്തിനിടെ മഴ പെയ്യാനുള്ള സാധ്യതയാണ് ആരാധകരെ ആശങ്കയിലാക്കുന്നത്.ശ്രീലങ്കയെ 124 റൺസിന് പരാജയപ്പെടുത്തിയാണ് ശ്രേയസ് അയ്യർ നയിക്കുന്ന ഇന്ത്യൻ ടീം ഫൈനലിൽ പ്രവേശിച്ചത്. സെമിയിൽ ആദ്യം ബാറ്റ് ചെയ്ത ഇന്ത്യ 20 ഓവറിൽ ഏഴ് വിക്കറ്റ് നഷ്ടത്തിൽ 169 റൺസ് നേടി. മറുപടി ബാറ്റിംഗിനിറങ്ങിയ ശ്രീലങ്കയെ ഇന്ത്യൻ ബൗളർമാർ 45 റൺസിന് പുറത്താക്കി.മറുവശത്ത് ബംഗ്ലാദേശിനെ ആറ് വിക്കറ്റിന് തോൽപ്പിച്ചാണ് പാകിസ്ഥാൻ ഫൈനലിലെത്തിയത്.
ഷാഹിബ്സാദ ഫർഹാന്റെ നേതൃത്വത്തിലാണ് പാകിസ്ഥാൻ ടീം മത്സരിക്കുന്നത്.അതേസമയം, മത്സരദിവസം രാവിലെ നിഷിനിൽ മഴയ്ക്ക് സാധ്യതയുണ്ടെന്നാണ് കാലാവസ്ഥാ പ്രവചനം. ഉച്ചയോടെ മഴയുടെ സാധ്യത കുറയുമെങ്കിലും മേഘാവൃതമായ അന്തരീക്ഷം തുടർന്നേക്കും.മഴയെ തുടർന്ന് ഇന്ത്യ–പാകിസ്ഥാൻ ഫൈനൽ നടത്താൻ കഴിയാത്ത സാഹചര്യമുണ്ടായാൽ ഇത്തവണ ഇരുടീമുകളും സ്വർണമെഡൽ പങ്കിടും. മുൻ ഏഷ്യൻ ഗെയിംസിൽ റാങ്കിംഗ് അടിസ്ഥാനമാക്കി വിജയിയെ തീരുമാനിച്ചിരുന്നെങ്കിലും 2026ലെ നിയമങ്ങളിൽ ഈ രീതിയിൽ മാറ്റം വരുത്തിയിട്ടുണ്ട്.
2023ലെ ഹാങ്‌ഷൂ ഏഷ്യൻ ഗെയിംസിൽ മഴ കാരണം ഇന്ത്യ–അഫ്ഗാനിസ്ഥാൻ ഫൈനൽ പൂർത്തിയാക്കാൻ കഴിയാതിരുന്നപ്പോൾ റാങ്കിംഗ് പരിഗണിച്ച് ഇന്ത്യയെ വിജയികളായി പ്രഖ്യാപിച്ചിരുന്നു. എന്നാൽ ഇത്തവണ സമാന സാഹചര്യമുണ്ടായാൽ ഇന്ത്യയ്ക്കും പാകിസ്ഥാനും സംയുക്തമായി സ്വർണം ലഭിക്കും.ഇന്ത്യയും പാകിസ്ഥാനും ഏഷ്യൻ ഗെയിംസ് ക്രിക്കറ്റിൽ വീണ്ടും നേർക്കുനേർ എത്തുന്ന മത്സരമെന്ന പ്രത്യേകതയും ഫൈനലിനുണ്ട്. മഴ മാറിനിൽക്കുകയാണെങ്കിൽ സ്വർണത്തിനായി ആവേശകരമായ പോരാട്ടത്തിനാണ് ആരാധകർ കാത്തിരിക്കുന്നത്.
