കരിയറിന്റെ ആദ്യകാലത്ത് താൻ നേരിട്ട ദുരനുഭവങ്ങളെക്കുറിച്ച് തുറന്നുപറഞ്ഞ് സൂപ്പർതാരം അമിതാഭ് ബച്ചൻ. അഭിനയിക്കാൻ അറിയില്ലെന്നും ഉയരം കൂടുതലാണെന്നും പറഞ്ഞ് തുടക്കകാലത്ത് സിനിമാ സെറ്റുകളിൽ നിന്ന് തന്നെ ഇറക്കിവിട്ടിട്ടുണ്ടെന്ന് അമിതാഭ് ബച്ചൻ പറഞ്ഞു. കോന് ബനേഗ കറോര്പതിയിലാണ് ബച്ചന്റെ വെളിപ്പെടുത്തല്. സെറ്റില് എന്നെങ്കിലും വഴക്ക് കേട്ടിട്ടുണ്ടോ എന്ന ചോദ്യത്തിന് മറുപടി നല്കുകയായിരുന്നു താരം. എനിക്ക് ഒരുപാട് വഴക്ക് കേട്ടിട്ടുണ്ട്.
തുടക്കകാലത്ത് എനിക്ക് ഭയങ്കരമായി വഴക്ക് കേട്ടിട്ടുണ്ട്. നിനക്ക് അഭിനയത്തെക്കുറിച്ച് ഒന്നും അറിയില്ല. നിനക്ക് ഉയരം കൂടുതലാണ്. തിരിച്ച് വീട്ടിലേക്ക് പൊക്കോളൂ എന്ന് പറഞ്ഞിട്ടുണ്ട്. ഒടുവില് എനിക്ക് അവസരം കിട്ടിയപ്പോള് അവര് പറഞ്ഞത്, അവിടെ നിന്ന് ഡയലോഗ് പറയൂവെന്നാണ്. പിന്നെ ഇങ്ങനെയാണോ ഡയലോഗ് പറയുന്നത്? എന്ന് ചോദിച്ചാകും വഴക്ക് പറയുക. അവര് വഴക്ക് പറഞ്ഞ് എന്നെ തിരുത്തും. പതിയെ പതിയെ ആണ് ഞാന് മെച്ചപ്പെട്ടതെന്നും അദ്ദേഹം പറഞ്ഞു.
പ്രായത്തെ വെല്ലുന്ന ആവേശവുമായി സിനിമയിൽ സജീവമായ അമിതാഭ് ബച്ചന്റേതായി നിരവധി ചിത്രങ്ങളാണ് അണിയറയിൽ ഒരുങ്ങുന്നത്. വമ്പൻ വിജയം നേടിയ ‘കൽക്കി 2898 എഡി’യുടെ രണ്ടാം ഭാഗമായ ‘കൽക്കി 2’, റിബ കെന്നഡി സംവിധാനം ചെയ്യുന്ന കോർട്ട് റൂം ഡ്രാമ ചിത്രം ‘സെക്ഷൻ 84’, രാം ഗോപാൽ വർമ്മയുടെ രാഷ്ട്രീയ ത്രില്ലറായ ‘സർക്കാർ 4’ തുടങ്ങി നിരവധി കാത്തിരിപ്പിലുള്ള പ്രൊജക്ടുകളാണ് താരത്തിന്റേതായി വരാനിരിക്കുന്നത്.
