തിരുവനന്തപുരം: സിഎംആര്എല്-എക്സാലോജിക് സാമ്പത്തിക ഇടപാട് കേസില് വാര്ത്താക്കുറിപ്പ് ഇറക്കിയത് സ്വാഭാവിക നടപടിയെന്ന് എൻഫോഴ്സ്മെന്റ് ഡയറക്ടറേറ്റ്. റെയ്ഡിന് പിന്നാലെ വാര്ത്താക്കുറിപ്പ് ഇറക്കുന്നത് അസാധാരണമല്ലെന്നാണ് ഇ ഡിയുടെ വിശദീകരണം. അനധികൃത പണമിടപാടുകളില് വീണ ടിക്കെതിരെ കൃത്യമായ തെളിവുകളുണ്ടെന്നും ഇതിന്റെ അടിസ്ഥാനത്തിലാണ് വാര്ത്താക്കുറിപ്പില് പരാമര്ശങ്ങള് നടത്തിയതെന്നും ഇ ഡി വ്യക്തമാക്കി.
കേസില് കുടൂതല് ചോദ്യം ചെയ്യലുകള് ഉടന് നടക്കുമെന്നും ഇ ഡി പറഞ്ഞു. വീണക്കെതിരെ വാര്ത്താക്കുറിപ്പ് ഇറക്കിയത് അസാധാരണ നടപടി ആണെന്ന് പ്രതിപക്ഷ നേതാവ് പിണറായി വിജയന് പ്രതികരിച്ചിരുന്നു. ഇതിന് പിന്നാലെയാണ് ഇ ഡിയുടെ വിശദീകരണം വന്നത്. തന്റെ മകളായതുകൊണ്ട് വിചിത്രമായ നടപടികള് നേരിടേണ്ടി വരുന്നുവെന്നും താനോ തന്റെ മകളോ ഒരു ഹവാല ഏര്പ്പാടിനും നിന്നിട്ടില്ലെന്നും ഇഡിയുടെ നടപടികള് വിചിത്രമാണെന്നും പിണറായി വിജയൻ പറഞ്ഞിരുന്നു. മാസപ്പടി കേസിൽ വീണ ടിക്കെതിരെ ഗുരുതരമായ കണ്ടെത്തെലുകൾ നടത്തിയതായി എൻഫോഴ്സ്മെന്റ് ഡയറക്റേറ്റ് വാർത്താക്കുറിപ്പിലൂടെ അറിയിച്ചിരുന്നു.
കേസുമായി ബന്ധപ്പെട്ട് വീണ വിദേശത്തേക്ക് പണം അയച്ചതിന്റെ തെളിവുകൾ ലഭിച്ചതായാണ് ഇഡി പുറത്തിറക്കിയ ഔദ്യോഗിക വാർത്താക്കുറിപ്പിൽ വ്യക്തമാക്കിയത്. ഇതേതുടർന്ന് കേസില് വീണ ടിയെ ചോദ്യം ചെയ്യാന് ഒരുങ്ങുകയാണ് അന്വേഷണ സംഘം. ഹാജാരാകാന് ആവശ്യപ്പെട്ട് സമന്സ് അയക്കാനാണ് തീരുമാനം. സിഎംആര്എല്-എക്സാലോജിക് സാമ്പത്തിക ഇടപാടി കേസിലെ പുതിയ കണ്ടെത്തലുകളുണ്ടെ അടിസ്ഥാനത്തിലാണ് നീക്കം. ഇതിന്റെ അടിസ്ഥാനത്തില് വീണയ്ക്കെതിരെ പുതിയ കേസ് രജിസ്റ്റര് ചെയ്യാനും തീരുമാനമുണ്ട്.
