കുവൈത്ത് സിറ്റി: കുവൈത്തിലെ ഹവല്ലിയിൽ വനിതാ ഡോക്ടറുടെ വീട്ടിൽ നിന്ന് ലക്ഷങ്ങൾ വിലമതിക്കുന്ന സ്വർണാഭരണങ്ങൾ കവർന്നു. ഏകദേശം 20,000 കുവൈത്തി ദീനാർ മൂല്യം വരുന്ന ആഭരണങ്ങളാണ് കിടപ്പുമുറിയിൽ നിന്ന് മോഷണം പോയത്. ജോലി കഴിഞ്ഞ് വീട്ടിൽ തിരിച്ചെത്തിയപ്പോഴാണ് മോഷണവിവരം ഡോക്ടർ അറിയുന്നത്. തുടർന്ന് ഇവർ ഉടൻ തന്നെ ആഭ്യന്തര മന്ത്രാലയത്തിന്റെ ഓപ്പറേഷൻസ് റൂമിൽ വിവരമറിയിക്കുകയായിരുന്നു. സ്വർണവില കുതിച്ചുയരുന്ന സാഹചര്യത്തിൽ ഒരു സമ്പാദ്യം എന്ന നിലയിലാണ് താൻ ഈ ആഭരണങ്ങൾ ശേഖരിച്ചു വെച്ചിരുന്നതെന്ന് ഡോക്ടർ പൊലീസിനോട് വ്യക്തമാക്കി.
