പാലക്കാട് : സംസ്ഥാനത്ത് നെല്ല് സംഭരണം കൂടുതൽ കാര്യക്ഷമമാക്കുന്നതിന് വാർഷിക കലണ്ടർ രൂപീകരിക്കുമെന്ന് കൃഷിമന്ത്രി ടി. സിദ്ദിഖ്. നെല്ല് സംഭരണം വേഗത്തിലാക്കാൻ അടിയന്തര നടപടി സ്വീകരിക്കും. മുടങ്ങിക്കിടക്കുന്ന നെല്ല് സംഭരണം അടുത്ത തിങ്കളാഴ്ചയോടെ പുനരാരംഭിക്കുമെന്നും മന്ത്രി അറിയിച്ചു. കൊല്ലങ്കോട് ആശ്രയം കോളേജ് ഓഫ് ആർട്സ് ആൻഡ് സയൻസിൽ നെൽ കർഷകരുമായി സംവദിക്കുകയായിരുന്നു മന്ത്രി.
സംഭരണ കേന്ദ്രങ്ങളുടെ അപര്യാപ്തത പരിഹരിക്കാൻ സപ്ലൈകോയും കൃഷി വകുപ്പും സംയുക്തമായി പ്രത്യേക പദ്ധതി നടപ്പിലാക്കും. പരമാവധി ഗോഡൗണുകൾ നിർമ്മിക്കാനുള്ള നടപടികൾ പുരോഗമിക്കുകയാണ്. കർഷകർക്ക് ആശ്വാസമേകാൻ വരുന്ന ജനുവരി, ഫെബ്രുവരി, മാർച്ച് മാസങ്ങളോടെ പുതിയ പ്രോസസിംഗ് യൂണിറ്റ് പ്രവർത്തനം ആരംഭിക്കുമെന്നും മന്ത്രി കൂട്ടിച്ചേർത്തു.
ചടങ്ങിൽ നെന്മാറ എം.എൽ.എ കെ. പ്രേമൻ അധ്യക്ഷത വഹിച്ചു. കൊല്ലങ്കോട് ബ്ലോക്ക് പഞ്ചായത്ത് പ്രസിഡന്റ് ശോഭന ജയപ്രകാശ്, കൊല്ലങ്കോട് ഗ്രാമപഞ്ചായത്ത് പ്രസിഡന്റ് അഡ്വ. അശ്വതി ദാസ്, സംയുക്ത പാടശേഖര സമിതി സെക്രട്ടറി അനിൽ ബാബു എന്നിവരും മറ്റ് ജനപ്രതിനിധികളും കർഷകരും ചടങ്ങിൽ പങ്കെടുത്തു.
