വിദേശകാര്യ മന്ത്രി ഡോ. എസ്. ജയശങ്കറിന്റെ ഒമാൻ സന്ദർശനം

മസ്കറ്റ്: ഇന്ത്യയുടെ വിദേശകാര്യ മന്ത്രി ഡോ. എസ്. ജയശങ്കർ 2026 ജൂലൈ 9, 10 തീയതികളിൽ ഒമാൻ സുൽത്താനേറ്റിൽ ഔദ്യോഗിക സന്ദർശനം നടത്തും. ഖത്തർ, ബഹ്റൈൻ, കുവൈത്ത് എന്നീ രാജ്യങ്ങളിലേക്കുള്ള സന്ദർശനങ്ങൾക്ക് ശേഷമാണ് അദ്ദേഹം ഒമാനിലെത്തുന്നത്. സന്ദർശനത്തിനിടെ ഒമാൻ വിദേശകാര്യ മന്ത്രി സയ്യിദ് ബദർ അൽ ബുസൈദിയുമായി ഡോ. ജയശങ്കർ ഉഭയകക്ഷി ചർച്ചകൾ നടത്തും. ഇന്ത്യ–ഒമാൻ ബന്ധത്തിന്റെ വിവിധ മേഖലകളിലെ സഹകരണം വിലയിരുത്തുന്നതിനൊപ്പം, 2025 ഡിസംബറിൽ പ്രധാനമന്ത്രി നരേന്ദ്ര മോദിയുടെ ഒമാൻ സന്ദർശന വേളയിൽ കൈക്കൊണ്ട തീരുമാനങ്ങളുടെ പുരോഗതിയും ഇരുപക്ഷവും അവലോകനം ചെയ്യും. 2026 ജൂൺ 1 മുതൽ പ്രാബല്യത്തിൽ വന്ന ഇന്ത്യ–ഒമാൻ സമഗ്ര സാമ്പത്തിക പങ്കാളിത്ത കരാറിന്റെ നടപ്പാക്കലിനുള്ള പ്രവർത്തന റോഡ്‌മാപ്പും ചർച്ചകളിലെ പ്രധാന വിഷയങ്ങളിലൊന്നായിരിക്കും. പ്രാദേശികവും അന്തർദേശീയവുമായ സമകാലിക വിഷയങ്ങളിലും ഇരുരാജ്യങ്ങളുടെയും വിദേശകാര്യ മന്ത്രിമാർ അഭിപ്രായങ്ങൾ കൈമാറുമെന്നാണ് റിപ്പോർട്ട്.