ദുബായ് : സമ്പന്നമായ ഭൂപ്രകൃതിയിലൂടെ എല്ലാ കാലാവസ്ഥയിലും സഞ്ചാരികളെ സ്വാഗതംചെയ്യുന്ന പ്രദേശമാണ് ഹത്ത. ഇവിടുത്തെ ഏറ്റവും മനോഹരമായ കാഴ്ചകൾ സമ്മാനിക്കുന്ന ഹിൽ പാർക്ക് സഞ്ചാരികളുടെ പറുദീസയാണ്. ചെറിയ കുന്നിൻമുകളിലാണ് ഈ വിനോദസഞ്ചാരകേന്ദ്രം സ്ഥിതിചെയ്യുന്നത്. ഹത്തയിലെ പർവതനിരകൾ ഉൾപ്പടെ മനോഹരമായ പ്രകൃതിദൃശ്യങ്ങൾ ഇവിടെനിന്ന് ആസ്വദിക്കാം. നഗരത്തിരക്കുകളിൽനിന്ന് മാറി കുടുംബസമേതം ഒഴിവുവേളകൾ ആനന്ദകരമാക്കാൻ അനുയോജ്യമായ ഇടം. കുട്ടികൾക്കായി ആകർഷകവും സുരക്ഷിതവുമായ ഒട്ടേറെ കളിസ്ഥലങ്ങളും മുതിർന്നവർക്ക് വിശ്രമിക്കാൻ ഇരിപ്പിടങ്ങളും പാർക്കിൽ ഒരുക്കിയിട്ടുണ്ട്. സൂര്യാസ്തമനവും സൂര്യോദയവും കാണാൻ ഒട്ടേറെ സന്ദർശകർ ഇവിടേക്കെത്താറുണ്ട്.
