ആലപ്പുഴ: ആലപ്പുഴയിലെ തുമ്പോളി എസ്എന്വി എല്പി സ്കൂളിന് 21 ദിവസത്തേക്ക് അവധി. മുണ്ടിനീര് വ്യാപിക്കുന്ന പശ്ചാത്തലത്തിലാണ് അവധി പ്രഖ്യാപിച്ചത്. ജില്ലാകളക്ടറാണ് ഇതുസംബന്ധിച്ച് ഉത്തരവിറക്കിയത്. സ്കൂളിലെ കുട്ടികള്ക്കിടയില് മുണ്ടിനീര് സ്ഥിരീകരിച്ച സാഹചര്യത്തിലാണ് അവധി.രോഗം കൂടുതല് കുട്ടികളിലേക്ക് വ്യാപിക്കാതിരിക്കാനായി ഇന്കുബേഷന് കാലയളവായ 21 ദിവസം സ്കൂളിന് അവധി നല്കണമെന്ന് ജില്ലാ മെഡിക്കല് ഓഫീസര് റിപ്പോര്ട്ട് സമര്പ്പിച്ചിരുന്നു.
ഇതേ തുടര്ന്നാണ് ജൂലൈ ഒന്ന് മുതല് 21 ദിവസത്തേക്ക് മുന്കാലപ്രാബല്യത്തോടെ അവധി അനുവദിച്ച് ജില്ലാ കളക്ടര് ഉത്തരവിട്ടത്.
ഈ ദിവസങ്ങളില് ക്ലാസുകള് ഓണ്ലൈനായി നടത്തുന്നതിന് വേണ്ട ക്രമീകരണങ്ങള് ജില്ലാ വിദ്യാഭ്യാസ ഉപഡയറക്ടര് ഒരുക്കണമെന്നും കളക്ടര് ഉത്തരവില് വ്യക്തമാക്കുന്നു. വിദ്യാലയങ്ങളില് മുണ്ടിനീര് പടര്ന്നുപിടിക്കാതിരിക്കാനുള്ള മുന്കരുതല് നടപടികള് ആരോഗ്യ, തദ്ദേശ സ്വയംഭരണ വകുപ്പുകള് സംയുക്തമായി സ്വീകരിക്കണമെന്നും നിര്ദ്ദേശമുണ്ട്.
മുണ്ടിനീര്, മുണ്ടിവീക്കം എന്നീ പേരുകളില് അറിയപ്പെടുന്ന ഈ രോഗം മിക്സോ വൈറസ് പരൊറ്റിഡൈറ്റിസ് എന്ന വൈറസ് മൂലം ആണ് ഉണ്ടാകുന്നത് . വായുവിലൂടെ പകരുന്ന ഈ രോഗം ഉമിനീര് ഗ്രന്ഥികളെ ആണ് ബാധിക്കുന്നത്. രോഗം ബാധിച്ചവരില് അണുബാധ ഉണ്ടായ ശേഷം ഗ്രന്ഥികളില് വീക്കം കണ്ടുതുടങ്ങുന്നതിനു തൊട്ടു മുമ്പും വീക്കം കണ്ടു തുടങ്ങിയ ശേഷം നാലു മുതല് ആറു ദിവസം വരെയുമാണ് സാധാരണയായി പകരുന്നത്.അഞ്ചു മുതല് 15 വയസ് വരെയുള്ള കുട്ടികളെയാണ് ഈ രോഗം കൂടുതല് ബാധിക്കുന്നതെങ്കിലും മുതിര്ന്നവരിലും കാണപ്പെടാറുണ്ട്. രോഗം കുട്ടികളിലേതിനേക്കാള് ഗുരുതരമാകുന്നത് മുതിര്ന്നവരിലാണ്. വായുവിലൂടെ പകരുന്ന ഈ രോഗം സാധാരണയായി ചുമ, തുമ്മല്, മൂക്കില് നിന്നുള്ള സ്രവങ്ങള്, രോഗമുള്ളവരുമായുള്ള സമ്പര്ക്കം എന്നിവയിലൂടെയാണ് പകരുന്നത്.
