ദുബായ് : സാഹസിക വിനോദങ്ങളെയും പ്രകൃതിയെയും സ്‌നേഹിക്കുന്നവർക്കായി ദുബായിലെ മുഷ്രിഫ് നാഷണൽ പാർക്കിൽ പുതിയ പാലം തുറന്നു. 102-മീറ്റർ നീളമുള്ള ഈ പാലം ദുബായ് മുനിസിപ്പാലിറ്റിയാണ് പൊതുജനങ്ങൾക്കായി തുറന്നുകൊടുത്തത്. ദുബായ് മീഡിയ ഓഫീസാണ് ഈ വിവരം ഔദ്യോഗികമായി പുറത്തുവിട്ടത്. സൈക്ലിങ്, ഹൈക്കിങ് പ്രേമികൾക്ക് കൂടുതൽ സുരക്ഷിതമായ യാത്രാനുഭവം നൽകാനാണ് ഇതിലൂടെ ലക്ഷ്യമിടുന്നത്.

സൈക്കിൾ ചവിട്ടുന്നവർക്കും കാൽനടയായി പ്രകൃതിഭംഗി ആസ്വദിക്കുന്നവർക്കും ഒരേസമയം ഉപയോഗിക്കാൻ കഴിയുന്ന രീതിയിൽ രണ്ട് പ്രത്യേക ലെയ്നുകളാണ് ഈ പാലത്തിലുള്ളത്. വാഹനങ്ങൾ പോകുന്ന റോഡ് മുറിച്ചുകടക്കാതെതന്നെ ട്രാക്കിലെ രണ്ട് ഭാഗങ്ങളെ തമ്മിൽ ബന്ധിപ്പിക്കാൻ ഈ പാലം സഹായിക്കുന്നു. അതിനാൽ യാത്രികർക്ക് വാഹനം ഇടിക്കുമെന്ന പേടിയില്ലാതെ സുരക്ഷിതമായി യാത്ര തുടരാം. ദുബായിലെ ഏറ്റവും വലിയ വനപ്രദേശവും പ്രധാന വിനോദസഞ്ചാര കേന്ദ്രങ്ങളിലൊന്നുമാണ് മുഷ്രിഫ് നാഷണൽ പാർക്ക്. കുടുംബങ്ങൾക്കും, ഫിറ്റ്‌നസ് പ്രേമികൾക്കും, സാഹസികത ഇഷ്ടപ്പെടുന്നവർക്കും ഒരുപോലെ പ്രിയപ്പെട്ട ഇടമാണിത്.