ഡൽഹി : മകൾ, ഭാര്യ, അമ്മ തുടങ്ങിയ വിലാസങ്ങളിലേക്ക് സ്ത്രീകൾ ഒതുങ്ങരുതെന്നും എല്ലാ സ്ത്രീകൾക്കും സ്വന്തമായ വ്യക്തിത്വമുണ്ടെന്നും ലോക്സഭാ പ്രതിപക്ഷ നേതാവ് രാഹുൽ ഗാന്ധി. മഹാരാഷ്ട്രയിലെ പുണെയിൽ ‘ഛാത്രോം കീ ഗുഞ്ജ്’ പരിപാടിയിൽ സംസാരിക്കുകയായിരുന്നു അദ്ദേഹം. സ്ത്രീകളുടെ സ്വാതന്ത്ര്യത്തെക്കുറിച്ച് സംസാരിക്കവേ മനുസ്മൃതിയെ അദ്ദേഹം വിമർശിക്കുകയും ചെയ്തു. സ്ത്രീകളെ മകളായോ ഭാര്യയായോ അമ്മയായോ ആണ് കാണുന്നത്. വ്യത്യസ്തങ്ങളായ പല കാര്യങ്ങൾ ചെയ്യുന്ന എത്രയോ മിടുമിടുക്കികളായ സ്ത്രീകൾ നമുക്കിടയിലുണ്ട്. എന്നിട്ടും അവർക്ക് ഇങ്ങനെയുള്ള വിലാസങ്ങൾ നൽകുന്നത് ശരിയല്ല. നിങ്ങളെ ഒരു അമ്മയായോ മകളായോ ഭാര്യയായോ കാണാം. അങ്ങനെ ഇരിക്കുന്നതിൽ യാതൊരു തെറ്റുമില്ല. പക്ഷേ, അത് മാത്രമാകരുത് നിങ്ങളുടെ വ്യക്തിത്വം. ഇപ്പറഞ്ഞ എല്ലാ വിശേഷണങ്ങൾക്കും ഒരു പുരുഷനുമായി ബന്ധമുണ്ടെന്നും രാഹുൽ പറഞ്ഞു.
