ന്യൂഡൽഹി: ഇ-കെവൈസി പൂർത്തിയാക്കാൻ സാധിക്കാത്തവർക്ക് സന്തോഷവാർത്ത. ഗാർഹിക എൽപിജി കണക്ഷനുകൾക്കുള്ള ഇ-കെവൈസി (ആധാർ ബയോമെട്രിക് രേഖപ്പെടുത്തൽ) പൂർത്തിയാക്കാനുള്ള അവസാന തീയതി ഓഗസ്റ്റ് 31 വരെ നീട്ടി. നേരത്തെ ഓഗസ്റ്റ് 23 വരെ നീട്ടി നൽകിയിരുന്നുവെങ്കിലും പിന്നീട് ഓഗസ്റ്റ് 31വരെ നീട്ടി നൽകുകയായിരുന്നു.

ഇ-കെവൈസി പൂർത്തിയാക്കാനുള്ള പുതിയ സമയപരിധി ഓഗസ്റ്റ് 31 ആണ്. ഇതുവരെ ഇ-കെവൈസി പൂർത്തിയാക്കാത്തവർക്ക് തീയതി സംബന്ധിച്ച് സന്ദേശം ലഭിക്കുമെന്ന് ഉദ്യോഗസ്ഥൻ പറഞ്ഞു. ഇ-കെവൈസി പ്രക്രിയ പൂർത്തിയാക്കിയതിനുശേഷം മാത്രമേ അന്തിമ കണക്ക് ലഭ്യമാകൂ എന്ന് എൽപിജി ഡീലർമാർ പറഞ്ഞു. എൽപിജി ബുക്കിങ്ങിലും ആഭ്യന്തര നിരക്ക് ആനുകൂല്യങ്ങളിലും ഉണ്ടാകാവുന്ന തടസ്സങ്ങൾ ഒഴിവാക്കാൻ 2026 ഓഗസ്റ്റ് 31ന് മുൻപ് ഉപഭോക്താക്കൾ ഇ-കെവൈസി പൂർത്തിയാക്കണം.

ഇ-കെവൈസി പ്രക്രിയ വിവിധ സംസ്ഥാനങ്ങളിൽ തിരക്കിന് കാരണമായി. പലയിടത്തും എൽപിജി ഡീലർഷിപ്പുകളിൽ നീണ്ട ക്യൂ പ്രത്യക്ഷപ്പെട്ടു. ഒഎംസി ആപ്പുകളിലൂടെയും ഓൺലൈൻ പ്ലാറ്റ്‌ഫോമുകളിലൂടെയുമുള്ള ഇ-കെവൈസി പ്രാമാണീകരണം പൂർത്തിയാക്കുന്നതിൽ ഉപഭോക്താക്കൾ ബുദ്ധിമുട്ടുകൾ നേരിട്ടിരുന്നു. ഇതുമായി ബന്ധപ്പെട്ട പരാതികൾ വ്യാപകമായതോടെയാണ് സമയപരിധി ഓഗസ്റ്റ് 16 മുതൽ ഓഗസ്റ്റ് 23 വരെ നീട്ടിയത്. എന്നാൽ, പിന്നീട് ഈ തീയതിയിലും മാറ്റം വരുത്തുകയായിരുന്നു.

സമയപരിധി അവസാനിക്കുന്നത് ഇ-കെവൈസി പൂർത്തിയാക്കുന്നതിന് തടസ്സമാകില്ലെന്ന് ഡീലർമാർ വ്യക്തമാക്കി. ഇ-കെവൈസി നടപടികൾ തുടർച്ചയായ പ്രക്രിയയായിരിക്കുമെന്ന് വ്യക്തമാക്കി. അതേസമയം, സമയപരിധിക്കുള്ളിൽ ഇ-കെവൈസി പൂർത്തിയാക്കാത്ത ഉപഭോക്താക്കൾക്ക് അവരുടെ പരിശോധന പൂർത്തിയാകുന്നതുവരെ ഗാർഹിക നിരക്കിൽ എൽപിജി സിലിണ്ടറുകൾ ബുക്ക് ചെയ്യുന്നതിൽ ബുദ്ധിമുട്ടുകൾ നേരിടേണ്ടിവരുമെന്ന് ഇന്ത്യൻ ഓയിൽ അറിയിച്ചു. ഉപഭോക്താക്കൾക്ക് സബ്‌സിഡിയോ ആഭ്യന്തര നിരക്കിലുള്ള ആനുകൂല്യങ്ങളോ താൽക്കാലികമായി നഷ്ടപ്പെട്ടേക്കാം. അല്ലെങ്കിൽ പരിശോധന പൂർത്തിയാകുന്നതുവരെ ഉയർന്ന നിരക്കിൽ സിലിണ്ടറുകൾ വാങ്ങേണ്ടിവരും.