അബുദാബി: ഡിജിറ്റൽ ഗവൺമെന്റ് സേവനങ്ങളിലെ ജനസംതൃപ്തിയിൽ ആഗോളതലത്തിൽ ഒന്നാമതായി യുഎഇ. ആഗോള കൺസൾട്ടിംഗ് സ്ഥാപനമായ ബോസ്റ്റൺ കൺസൾട്ടിംഗ് ഗ്രൂപ്പ് പുറത്തുവിട്ട 2026-ലെ ഡിജിറ്റൽ ഗവൺമെന്റ് സർവേയിലാണ് യുഎഇ ഈ നേട്ടം കൈവരിച്ചത്. സർവേയിൽ പങ്കെടുത്ത 89 ശതമാനം ആളുകളും യുഎഇയുടെ ഡിജിറ്റൽ ഗവൺമെന്റ് സേവനങ്ങൾക്ക് മികച്ച റേറ്റിംഗ് നൽകി. അബുദാബിയിൽ ആരംഭിച്ച ‘എഐ എവരിതിംഗ്’ സമ്മിറ്റിലാണ് ഈ അന്താരാഷ്ട്ര റിപ്പോർട്ട് പുറത്തുവിട്ടത്. ലോകമെമ്പാടുമുള്ള 44 രാജ്യങ്ങളിലാണ് ബോസ്റ്റൺ കൺസൾട്ടിംഗ് ഗ്രൂപ്പ് പഠനം നടത്തിയത്. ഡിജിറ്റൽ ഗവൺമെന്റ് സേവനങ്ങളുടെ ഉപയോഗത്തിലും യുഎഇ തന്നെയാണ് മുന്നിൽ. സർവേയിൽ പങ്കെടുത്ത 53 ശതമാനം ആളുകളും ഇത്തരം ഡിജിറ്റൽ സേവനങ്ങൾ നിരന്തരം ഉപയോഗിക്കുന്നതായി അറിയിച്ചു.
കൂടാതെ, സ്വകാര്യ മേഖലയിലെ സ്ഥാപനങ്ങളേക്കാൾ മികച്ചതും വേഗമേറിയതുമായ സേവന അനുഭവമാണ് തങ്ങൾക്ക് ഗവൺമെന്റ് ഡിജിറ്റൽ ഇടപാടുകളിലൂടെ ലഭിച്ചതെന്ന് 76 ശതമാനം ആളുകൾ സാക്ഷ്യപ്പെടുത്തി.ശക്തമായ ഡിജിറ്റൽ അടിത്തറ നിർമ്മിത ബുദ്ധി സേവനങ്ങളിലേക്ക് മാറാനും യുഎഇക്ക് സഹായകമാകുന്നുണ്ട്. യുഎഇയിലെ 82 ശതമാനം ജനങ്ങളും പ്രതിവാര അടിസ്ഥാനത്തിൽ എഐ സാങ്കേതികവിദ്യകൾ ഉപയോഗിക്കുന്നവരാണ്. ഗവൺമെന്റ് തലത്തിൽ എഐ നടപ്പിലാക്കുന്നത് അപകടസാധ്യതകളേക്കാൾ കൂടുതൽ ഗുണങ്ങൾ നൽകുമെന്നാണ് 53 ശതമാനം ആളുകളുടെയും വിശ്വാസം. ആഗോളതലത്തിൽ ഇത് 36 ശതമാനവും ജിസിസി തലത്തിൽ 49 ശതമാനവുമാണ്.
ജിസിസി മേഖലയിൽ പൊതുവേ എഐ അധിഷ്ഠിത ഗവൺമെന്റ് സേവനങ്ങൾക്ക് വലിയ പിന്തുണയാണുള്ളത്. എഐ വഴിയുള്ള സേവനങ്ങളെ സ്വീകരിക്കാൻ ലോകത്ത് ഏറ്റവും സന്നദ്ധത കാണിക്കുന്നതും ജിസിസി നിവാസികളാണ് (79%). ലളിതമായ സേവനങ്ങൾ എഐ ഏജന്റുകൾ വഴിയും സങ്കീർണ്ണമായ വിഷയങ്ങൾ ഘടനാപരമായ രീതിയിൽ അധികൃതരുടെ ഇടപെടലുകളോടെയും നിർവ്വഹിക്കപ്പെടാനാണ് ഭൂരിഭാഗം പേരും താൽപ്പര്യപ്പെടുന്നത്. ഡിജിറ്റൽ രംഗത്തെ ഈ ആഗോള മേധാവിത്വം അടുത്ത തലമുറ എഐ സേവനങ്ങളിലേക്ക് മാറ്റിയെടുക്കാൻ ഗൾഫ് രാജ്യങ്ങൾക്ക് വലിയ അവസരമുണ്ടെന്ന് ബിസിജി ഡയറക്ടർ ഡോ. ലാർസ് ലിറ്റിഗ് വ്യക്തമാക്കി.
