പാലക്കാട്: പാലക്കാട് ഒറ്റപ്പാലം ശ്രീകൃഷ്ണപുരത്ത് അങ്കണവാടി ടീച്ചർക്ക് പാമ്പുകടിയേറ്റു. വിശാലക്ക് (57) ആണ് പാമ്പു കടിയേറ്റത്. അങ്കണവാടി പരിസരം വൃത്തിയാക്കുന്നതിനിടെയാണ് സംഭവം. എന്നാൽ കടിച്ചത് വിഷപാമ്പല്ലെന്ന വിവരവും പുറത്തുവരുന്നുണ്ട്. കുഴിമണലി എന്ന ഇനത്തിൽപെട്ട പാമ്പാണ് കടിച്ചത്. രാവിലെ 11 മണിയോടെ അങ്കണവാടിയുടെ മുറ്റം അടിച്ചുവാരുന്നതിനിടെയായിരുന്നു സംഭവം. കൈവിരലിനാണ് കടിയേറ്റത്. ഉടനെ നാട്ടുകാർ വിശാലയെ ഒറ്റപ്പാലം താലൂക്ക് ആശുപത്രിയിൽ എത്തിച്ചു. കടിച്ച പാമ്പിനെയും പിടികൂടി കൊണ്ടുപോയിരുന്നു. വിഷപാമ്പല്ലെന്ന് ഡോക്ടർ പറഞ്ഞു. പ്രാഥമിക ചികിത്സ നൽകി വിശാലയെ തിരിച്ചയച്ചു.
