ദുബൈ: അധ്യയന വർഷാരംഭത്തിന്റെ ഭാഗമായി യു.എ.ഇ ആഭ്യന്തര മന്ത്രാലയം ആരംഭിച്ച സുരക്ഷിത റോഡ് കാമ്പയിനിന് മികച്ച പ്രതികരണം. അധ്യയന വർഷം തുടങ്ങുന്ന ദിവസമായ ആഗസ്റ്റ് 31ന് അപകടമുണ്ടാക്കാത്ത ഡ്രൈവർമാർക്ക് മികച്ച ഓഫറാണ് ആഭ്യന്തര മന്ത്രാലയം ഒരുക്കിയിരിക്കുന്നത്. ഈ ദിവസം അപകടമൊന്നുമുണ്ടാക്കാതെ വാഹനം ഓടിക്കുന്ന ഡ്രൈവർമാരിൽ ബ്ലാക്ക് പോയിന്റുള്ളവർക്ക് അവരുടെ പേരിൽ നിന്ന് നാല് ബ്ലാക്ക് പോയിന്റ് കുറക്കുമെന്നാണ് ആഭ്യന്തര മന്ത്രാലയം പ്രഖ്യാപിച്ചിരിക്കുന്നത്. ഇതിനായി ഓൺലൈനായുള്ള രജിസ്ട്രേഷനും ആരംഭിച്ചിട്ടുണ്ട്. ആഗസ്റ്റ് 17 മുതലാണ് രജിസ്ട്രേഷൻ തുടങ്ങിയത്. ഇതിനായി ഡ്രൈവർമാർ ഓൺലൈൻ പ്രതിജ്ഞയിൽ ഒപ്പിടണം.
ആഗസ്റ്റ് 31 പൂർണമായും അപകട രഹിതമാക്കുകയാണ് പദ്ധതിയുടെ ലക്ഷ്യം. അമിത വേഗത ഒഴിവാക്കുക, സുരക്ഷിത അകലം പാലിക്കുക, ഓവർടേക്ക് ചെയ്യുമ്പോഴും ലൈൻ മാറുമ്പോഴും സൂക്ഷ്മത പാലിക്കുക തുടങ്ങിയ നിർദേശങ്ങളും മുന്നോട്ടുവെച്ചിട്ടുണ്ട്. സ്കൂളുകൾക്ക് സമീപം റോഡ് സുരക്ഷ ഉറപ്പാക്കുന്നതിനൊപ്പം മികച്ച റോഡ് സംസ്കാരവും സൃഷ്ടിക്കുകയാണ് പദ്ധതിയുടെ ലക്ഷ്യമെന്ന് ദുബൈ ട്രാഫിക് പൊലീസ് മേധാവി ബ്രിഗേഡിയർ ജുമാ ബിൻ സുവൈദാൻ വ്യക്തമാക്കി.
