ദുബൈ: ആധുനിക ദുബൈയുടെ അടയാളമായി തലയുയർത്തി നിന്ന ടൊയോട്ട ബിൽഡിങ് വൈകാതെ ഓർമയാകും. ദുബൈയിലെ ആദ്യത്തെ 15 നില കെട്ടിടമായ ഈ ബിൽഡിങിന് ഏതാനും മാസങ്ങൾ മാത്രമാണ് ഇനി ആയുസ്സുള്ളത്. ഒരു കാലത്ത് ദുബൈയുടെ ഐക്കൺ ആയിരുന്ന കെട്ടിടം വൈകാതെ ഗൃഹാതുര ഓർമയാകും. അരനൂറ്റാണ്ടിൽ അധികം പ്രവാസികൾ അടക്കമുള്ളവർ അബൂദബിയിൽ നിന്ന് യാത്ര ചെയ്യുമ്പോൾ ദുബൈ എത്തി എന്ന് ഓർമിപ്പിച്ചിരുന്ന കെട്ടിടം കൂടിയാണിത്. കെട്ടിടം പൊളിക്കുന്നതിന്റെ ഭാഗമായി വാടകക്കാരെ ഒഴിപ്പിച്ചുതുടങ്ങി. 70 ശതമാനം വാടകക്കാരെയും ഒഴിപ്പിച്ചുകഴിഞ്ഞു. ബാക്കി വാടകക്കാരെ ഡിസംബറോടെ ഒഴിപ്പിക്കും. അടുത്തവർഷത്തോടെ പൊളിച്ചു നീക്കുമെന്നാണ് വിവരം.
1974ൽ സ്ഥാപിതം, 15 നില, 65 മീറ്റർ ഉയരം ബുർജ് ഖലീഫയും ബുർജുൽ അറബും പ്രിൻസസ് ടവറും അടക്കം അംബരചുംബികൾ ആകാശം മുട്ടി നിൽക്കുന്ന ദുബൈയുടെ വളർച്ചയിലെ ആദ്യ കാൽവെപ്പ് കൂടിയാണ് ടൊയോട്ട ബിൽഡിങ്. 1974ലാണ് ഈ 15 നില കെട്ടിടത്തിന്റെ നിർമാണം പൂർത്തിയായത്. 15 നിലയുള്ള ദുബൈയിലെ ആദ്യ കെട്ടിടം കൂടിയായിരുന്നു ഇത്. 65 മീറ്ററാണ് ഉയരം.
