ന്യൂഡൽഹി: ടെലഗ്രാമിന് നോട്ടീസ് നൽകി കേന്ദ്രസർക്കാർ. ഒടിടി കണ്ടന്റുകളുടെ അമിതമായ പ്രചാരണത്തിനെതിരെയാണ് നോട്ടീസ്. അടിയന്തര നടപടി സ്വീകരിക്കണമെന്ന് ആവശ്യപ്പെട്ടാണ് നോട്ടീസ് നൽകിയിരിക്കുന്നത്. 15 ദിവസത്തിനുള്ളിൽ സ്വീകരിച്ച നടപടികളുടെ റിപ്പോർട്ട് സമർപ്പിക്കാനും നിർദേശമുണ്ട്. ഒടിടി പ്ലാറ്റ്ഫോമിലെ കണ്ടന്റുകളും സിനിമകളുമെല്ലാം പകർപ്പ് അവകാശ ലംഘനം നടത്തി ടെലഗ്രാമിലൂടെ വ്യാപകമായി പ്രചരിപ്പിക്കുന്നു എന്ന് വ്യാപകമായി പരാതി ഉയർന്നിരുന്നു.
ഈ പരാതിയുടെ അടിസ്ഥാനത്തിലാണ് നിലവിൽ കേന്ദ്ര വാർത്താ വിനിമയ മന്ത്രാലയം ടെലഗ്രാമിന് നോട്ടീസ് നൽകിയിരിക്കുന്നത്. ഇത്തരത്തിൽ പകർപ്പ് അവകാശമുള്ള ഉള്ളടക്കങ്ങൾ വ്യാപകമായി പ്രചരിപ്പിക്കുന്ന ഏകദേശം 3100 ലധികം ഗ്രൂപ്പുകളെ ടെലഗ്രാമിൽ കണ്ടെത്തിയിട്ടുണ്ട്.
ഈ ഗ്രൂപ്പുകൾ ഉടനടി നീക്കം ചെയ്യുകയോ ബ്ലോക്ക് ചെയ്യുകയോ ചെയ്യണമെന്നാണ് ഇപ്പോൾ കേന്ദ്ര സർക്കാർ ആവശ്യപ്പെട്ടിരിക്കുന്നത്. 15 ദിവസത്തിനകം ഇതിൽ നടപടിയെടുത്ത് കേന്ദ്രസർക്കാരിന് റിപ്പോർട്ട് സമർപ്പിക്കണമെന്നും ടെലഗ്രാമിനോട് ആവശ്യപ്പെട്ടിട്ടുണ്ട്.
പുതിയതായി റിലീസ് ചെയ്യുന്ന സിനിമകൾ, വെബ്സീരിസുകൾ അതുപോലെ തന്നെ പകർപ്പ് അവകാശമുളള മറ്റ് ഉള്ളടക്കങ്ങൾ എല്ലാം റിലീസ് ചെയ്ത ഉടനെ തന്നെ ടെലഗ്രാമിൽ ലഭ്യമാക്കുന്നതോടെ ഒടിടി പ്ലാറ്റ്ഫോമുകൾ, ചലച്ചിത്ര മേഖലകൾ ഇവയൊക്കെ വലിയ പ്രതിസന്ധി നേരിടുന്നുണ്ട്. ഇതിന് പിന്നാലെയാണ് നിർമാതാക്കൾ അടക്കമുള്ളവർ കേന്ദ്രത്തിന് ഇത്തരത്തിൽ പരാതി നൽകിയിരിക്കുന്നത്. ഈ പരാതിയിൻമേലാണ് നോട്ടീസ് നൽകിയിരിക്കുന്നത്.
