തിരുവനന്തപുരം: കേരളത്തിലെ മുഖ്യമന്ത്രിയായി വിഡി സതീശനെ തീരുമാനിച്ചതിൽ ബിജെപിയുടെ പ്രചാരണം കൂടുതൽ ശക്തമാക്കി സംസ്ഥാന അധ്യക്ഷൻ രാജീവ് ചന്ദ്രശേഖർ. ലീഗ്, ജമാ അത്തെ സ്വാധീനമാണ് മുഖ്യമന്ത്രി തീരുമാനത്തിന് പിന്നിലെന്നാണ് ബിജെപി സംസ്ഥാന ഘടകം ആരോപിക്കുന്നത്. അത് ആവർത്തിക്കുകയാണ് രാജീവ് ചന്ദ്രശേഖർ ഇപ്പോൾ. 11 ദിവസത്തെ തർക്കങ്ങളും ചർച്ചകളും കഴിഞ്ഞ് കോൺഗ്രസിന്റെ നേതൃത്വത്തിലുള്ള UDF കേരളത്തിന്റെ മുഖ്യമന്ത്രിയെ പ്രഖ്യാപിച്ചു. ഒരു പാർട്ടിക്ക് സ്വന്തം മുഖ്യമന്ത്രിയെ തിരഞ്ഞെടുക്കാനുള്ള അവകാശമുണ്ട്. പക്ഷേ ഞെട്ടിപ്പിക്കുന്നതും ആശങ്കാജനകവുമായ കാര്യം, കേരളത്തിന്റെ മുഖ്യമന്ത്രിയെ തീരുമാനിച്ചത് ജമാഅത്തെ ഇസ്ലാമിയും മുസ്ലിം ലീഗും ചേർന്നാണ് എന്നതാണ്. കോൺഗ്രസ് ജനാധിപത്യവിരുദ്ധവും ഭരണഘടനാവിരുദ്ധവുമായി പ്രവർത്തിക്കുന്ന ജമാഅത്തെ ഇസ്ലാമിയുമായി തുറന്ന രാഷ്ട്രീയ സഖ്യം ഉണ്ടാക്കിയതുമുതൽ, ഇത്തരം മതനിരപേക്ഷതക്കെതിരായ അപകടകരമായ ശക്തികൾക്ക് മുഖ്യധാരാ രാഷ്ട്രീയത്തിലും ഭരണത്തിലും ഇടം ലഭിക്കുന്നതിൻ്റെ ഭീഷണിയെക്കുറിച്ച് ഞാൻ മുന്നറിയിപ്പ് നൽകിയിരുന്നുവെന്നും അദ്ദേഹം ഫേസ്ബുക്കിൽ കുറിച്ചു.
ഇത് കേരളത്തിനും രാജ്യത്തിനും വലിയ ഭീഷണിയാണ്. ഓരോ മലയാളിയും അരക്ഷിതരായി, ആശങ്കയോടെ ജീവിക്കേണ്ട സാഹചര്യമാണിത്. ഒരു വശത്ത് ഇന്ത്യൻ ഭരണഘടന കൈയിൽ പിടിച്ച് സംസാരിക്കുകയും മറുവശത്ത് തീവ്രവാദപരവും മതനിരപേക്ഷതയില്ലാത്ത തീവ്ര മുസ്ലിം സംഘടനകളുമായി സഖ്യരാഷ്ട്രീയം കളിക്കുകയും ചെയ്യുന്ന അതേ നാണമില്ലാത്ത കോൺഗ്രസാണ് ഇതെന്നും രാജീവ് ചന്ദ്രശേഖർ ഫേസ്ബുക്കിൽ കുറിച്ചു .
