ദുബായ് : അൽ ഖൈൽ റോഡിനും ശൈഖ് മുഹമ്മദ് ബിൻ സായിദ് റോഡിനും സമാന്തരമായി ഗതാഗത സൗകര്യം വർധിപ്പിക്കുന്നതിനായി പുതിയ പദ്ധതിയുമായി ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി . അൽ മൈതാൻ സ്ട്രീറ്റ് കേന്ദ്രീകരിച്ച് നടപ്പാക്കുന്ന വൻകിട റോഡ് വികസന പദ്ധതിക്കായി 116 കോടി ദിർഹത്തിന്റെ രണ്ട് കരാറുകൾ ആർ.ടി.എ. ഒപ്പുവെച്ചു.
2028-ൽ പൂർത്തിയാക്കാൻ ലക്ഷ്യമിടുന്ന ഈ പദ്ധതിയിലൂടെ തെക്ക്-വടക്ക് ഭാഗത്തെ ഗതാഗതശേഷി 18 ശതമാനം വർധിക്കും. കൂടാതെ പ്രധാന റോഡുകളിലെ യാത്രാസമയത്തിൽ വലിയ കുറവുണ്ടാകും. അൽ മനാമ സ്ട്രീറ്റിൽനിന്ന് ദുബായ്-അൽ ഐൻ റോഡ് വഴി ഉം സുഖീം സ്ട്രീറ്റിലേക്കുള്ള യാത്രാസമയം നിലവിലെ 30 മിനിറ്റിൽനിന്ന് 10 മിനിറ്റായി ചുരുങ്ങും. 66 ശതമാനത്തിന്റെ കുറവാണ് സമയത്തിൽ ഉണ്ടാകുക.
