കുവൈത്ത് സിറ്റി: ബലിപെരുന്നാൾ പ്രമാണിച്ച് കുട്ടികൾക്കും പ്രിയപ്പെട്ടവർക്കും പെരുന്നാൾ പണസമ്മാനം നൽകാൻ കുവൈത്ത് സെൻട്രൽ ബാങ്ക്. ഈദിയ നൽകുന്നതിനായി വിവിധ മൂല്യങ്ങളുള്ള പുതിയ കറൻസി നോട്ടുകൾ ലഭ്യമാക്കുന്ന പ്രത്യേക എടിഎം സംവിധാനം ആണ് കുവൈത്ത് സെൻട്രൽ ബാങ്ക് ക്രമീകരിച്ചിരിക്കുന്നത് . പെരുന്നാൾ കാലത്ത് പുതിയ ദിനാർ നോട്ടുകൾക്ക് സ്വദേശികൾക്കിടയിൽ ആവശ്യക്കാർ ഏറുന്നത് കണക്കിലെടുത്താണ് രാജ്യത്തെ പ്രമുഖ ഷോപ്പിംഗ് മാളുകളിൽ ഈ താൽക്കാലിക എടിഎമ്മുകൾ സ്ഥാപിച്ചിരിക്കുന്നത്. രാജ്യത്തെ പ്രമുഖ ഷോപ്പിംഗ് കേന്ദ്രങ്ങളായ ദി അവന്യൂസ് , 360 മാൾ, അൽ കൂത് മാൾ, കാപ്പിറ്റൽ മാൾ എന്നിവിടങ്ങളിൽ മെയ് 21 മുതൽ അറഫാ ദിനം അവസാനിക്കുന്നത് വരെ ഈ എടിഎം സേവനം ലഭ്യമായിരിക്കും.

കുവൈത്ത് ബാങ്കിംഗ് അസോസിയേഷൻ, കെ-നെറ്റ് , മാൾ മാനേജ്‌മെന്റുകൾ എന്നിവയുമായി സഹകരിച്ചാണ് സെൻട്രൽ ബാങ്ക് ഈ സേവനം പൊതുജനങ്ങൾക്കായി ഒരുക്കിയിട്ടുള്ളത്. സാധാരണ എടിഎമ്മുകളിൽ ലഭ്യമാകാത്ത ചെറിയ തുകകളുടെ (ഉദാഹരണത്തിന് കാൽ ദിനാർ, അര ദിനാർ, ഒരു ദിനാർ, അഞ്ച് ദിനാർ) പുതിയ കറൻസി നോട്ടുകൾ ഈ മെഷീനുകളിലൂടെ എളുപ്പത്തിൽ ലഭിക്കും. മുൻവർഷങ്ങളിലും ഈ പദ്ധതിക്ക് പൊതുജനങ്ങളിൽ നിന്നും മികച്ച പ്രതികരണമാണ് ലഭിച്ചതെന്നും ബാങ്കുകളിൽ പോയി പുതിയ നോട്ടുകൾ മാറാനുള്ള ജനങ്ങളുടെ ബുദ്ധിമുട്ട് ഒഴിവാക്കാൻ ഇതിലൂടെ സാധിക്കുമെന്നും സെൻട്രൽ ബാങ്ക് പ്രസ്താവനയിൽ വ്യക്തമാക്കി.