മയാമി: ലോകകപ്പ് ഫുട്ബോളിൽ കിരീടം നിലനിർത്താൻ ഇറങ്ങിയ അർജന്റീനയ്ക്ക് ക്വാർട്ടർ ഫൈനൽ പ്രവേശനം അത്ര എളുപ്പമായിരുന്നില്ല. ടൂർണമെന്റിലെ കന്നിക്കാരായ കേപ് വെർദെയെ അധികസമയത്ത് 3-2 എന്ന സ്കോറിന് മറികടന്നാണ് അർജന്റീന അവസാന എട്ടിൽ ഇടംപിടിച്ചത്. കേപ്പ് വെർദെയുടെ കരുത്തുറ്റ പ്രകടനം അർജന്റീനയെ ശരിക്കും വിയർപ്പിച്ചു. മത്സരം അനായാസമായിരിക്കുമെന്ന് കരുതിയവർക്ക് മറുപടിയായി അർജന്റീന കോച്ച് ലയണൽ സ്കലോണി പറഞ്ഞത്, ‘ലോകകപ്പിൽ എളുപ്പമുള്ള നോക്കൗട്ട് മത്സരങ്ങളില്ല’ എന്നാണ്. സ്കലോണിയുടെ വാക്കുകൾ… ”ഞങ്ങൾക്ക് എളുപ്പമുള്ള വഴിയാണ് ലഭിച്ചതെന്ന് പറഞ്ഞവർക്കുള്ള മറുപടിയാണിത്. തീർച്ചയായും, ഞങ്ങൾ ജയിക്കാൻ അർഹരായിരുന്നു, പക്ഷേ ഇതൊരു കഠിനമായ മത്സരമായിരുന്നു. കളിക്കാർ തളർന്നുപോയിരുന്നു. എന്നാൽ അവർ ഹൃദയം കൊണ്ട് കളിച്ചപ്പോൾ ഏത് പ്രതിസന്ധിയെയും മറികടക്കാൻ അവർക്ക് സാധിച്ചു. അർജന്റീനക്കാരനാവുക എന്നാൽ കഷ്ടപ്പാടുകൾ അനുഭവിക്കുക എന്നു കൂടിയാണ്. ഞങ്ങളുടെ ആരാധകർക്ക് അത് നന്നായി അറിയാം. ഈ ജേഴ്സിക്ക് എന്തോ ഒരു പ്രത്യേകതയുണ്ട്. ഞങ്ങൾ കൂടുതൽ കരുത്തോടെ മുന്നോട്ട് പോകും ” സ്കലോണി മാധ്യമങ്ങളോട് പറഞ്ഞു. പിച്ച് അത്ര നല്ലതായിരുന്നില്ലെന്നും പന്ത് താൻ ആഗ്രഹിച്ച രീതിയിൽ നീങ്ങിയില്ലെന്നും അദ്ദേഹം സൂചിപ്പിച്ചു. കേപ്പ് വെർദെ രണ്ടാം തവണയും സമനില പിടിച്ചപ്പോൾ താൻ ആശങ്കയിലായിരുന്നുവെന്നും അദ്ദേഹം സമ്മതിച്ചു.
കേപ് വെർദെക്കെതിരായ മത്സരത്തിന് പിന്നാലെ ലയണൽ സ്കലോണി
