ഗൾഫ് രാജ്യങ്ങളിൽ നിന്ന് ഇന്ത്യയുടെ വിവിധ നഗരങ്ങളിലേക്കുള്ള സർവീസുകളുടെ എണ്ണം ഗണ്യമായി വർദ്ധിപ്പിക്കാൻ ബജറ്റ് എയർലൈനായ എയർ ഇന്ത്യ എക്സ്പ്രസിന്റെ തീരുമാനം. 2026 വിന്റർ ഷെഡ്യൂളിന്റെ ഭാഗമായി ഗൾഫ് മേഖലയിലേക്ക് പ്രതിദിനം 135 വിമാന സർവീസുകൾ വരെയാണ് കമ്പനി നടത്തുക. കൊച്ചി, കോഴിക്കോട്, ബെംഗളൂരു, ഡൽഹി, മുംബൈ, ഹൈദരാബാദ് തുടങ്ങിയ പ്രധാന കേന്ദ്രങ്ങളിൽ നിന്നാണ് വിമാന സർവീസുകൾ വർദ്ധിപ്പിക്കുന്നത്.
ഇന്ത്യയ്ക്കും മിഡിൽ ഈസ്റ്റിനും ഇടയിൽ ഏറ്റവും തിരക്കേറിയ റൂട്ടുകളായ ദുബായ്, അബുദാബി, ഷാർജ, ദമാം, ജിദ്ദ, റിയാദ്, ദോഹ, മസ്‌കറ്റ്, കുവൈറ്റ് സിറ്റി, അൽ ഐൻ തുടങ്ങിയ നഗരങ്ങളിലേക്കാണ് കൂടുതൽ വിമാന സർവീസുകൾ ഉൾപ്പെടുത്തിയിരിക്കുന്നത്. ഇന്ത്യയിലെ 23 നഗരങ്ങളെ ബഹ്‌‌റൈൻ, കുവൈറ്റ്, ഒമാൻ, ഖത്തർ, സൗദി അറേബ്യ, യുഎഇ എന്നീ രാജ്യങ്ങളിലെ 12 പ്രധാന കേന്ദ്രങ്ങളുമായി 88 നോൺ-സ്റ്റോപ്പ് റൂട്ടുകൾ വഴി എയർലൈൻ ബന്ധിപ്പിക്കും.
എയർ ഇന്ത്യ എക്സ്പ്രസിന്റെ അന്താരാഷ്ട്ര ശൃംഖലയിൽ ഏറ്റവും പ്രധാനപ്പെട്ട മേഖലയാണ് മിഡിൽ ഈസ്റ്റ്. ഈ ശൈത്യകാലത്ത് ആഗോളതലത്തിൽ 99 ലക്ഷ്യസ്ഥാനങ്ങളിലേക്ക് പ്രതിദിനം 150 അന്താരാഷ്ട്ര സർവീസുകൾ വരെ കമ്പനി ലഭ്യമാക്കും. ലക്ഷക്കണക്കിന് പ്രവാസി ഇന്ത്യക്കാർ താമസിക്കുന്ന ഗൾഫ് മേഖലയിൽ, പ്രത്യേകിച്ച് 40 ലക്ഷത്തിലധികം ഇന്ത്യക്കാരുള്ള യുഎഇയിൽ, ജോലി, കുടുംബം, വിനോദ യാത്രകൾ എന്നിവയ്ക്കായി സഞ്ചരിക്കുന്ന യാത്രക്കാർക്ക് ഈ പുതിയ ഷെഡ്യൂൾ വലിയ ആശ്വാസമാകും.
