ഗൾഫ് രാജ്യങ്ങളിൽ നിന്നുള്ള പ്രവാസി തൊഴിലാളികളുടെ പണമയക്കലിൽ സർവ്വകാല റെക്കോർഡ്. 2025-ൽ ജിസിസി രാജ്യങ്ങളിൽ നിന്ന് പ്രവാസികൾ ആകെ 161 ബില്യൺ യുഎസ് ഡോളറാണ് സ്വന്തം നാടുകളിലേക്ക് അയച്ചത്. എണ്ണയിതര മേഖലകളിലെ വൻ കുതിപ്പും തൊഴിലവസരങ്ങളുടെ വർദ്ധനവുമാണ് പ്രവാസി പണമൊഴുക്കിൽ ഈ ചരിത്ര നേട്ടത്തിന് വഴിതെളിച്ചത്.
സ്ഥിതിവിവരക്കണക്കുകൾ വ്യക്തമാക്കുന്നത് അനുസരിച്ച്, മുൻവർഷത്തെ അപേക്ഷിച്ച് 13.6 ശതമാനത്തിന്റെ വൻ വർദ്ധനവാണ് പണമയക്കലിൽ ഉണ്ടായിരിക്കുന്നത്. അതായത്, ഒറ്റവർഷം കൊണ്ട് 19 ബില്യൺ ഡോളറിന്റെ വർദ്ധനവ് രേഖപ്പെടുത്തി. ഗൾഫ് മേഖലയിൽ നിന്നുള്ള പ്രവാസി പണമൊഴുക്കിൽ തുടർച്ചയായ രണ്ടാം വർഷമാണ് ഇത്തരത്തിൽ വൻ കുതിച്ചുചാട്ടം ഉണ്ടാകുന്നത്. ഔദ്യോഗിക വിവരശേഖരണ കേന്ദ്രമായ ജിസിസി-സ്റ്റാറ്റിന്റെ (GCC-Stat) റിപ്പോർട്ടിലാണ് ഈ വിവരങ്ങളുള്ളത്.
ഗൾഫ് സമ്പദ്‌വ്യവസ്ഥ കേവലം എണ്ണ ഉത്പ്പാദനത്തിൽ മാത്രം ഒതുങ്ങിനിൽക്കാതെ എണ്ണയിതര മേഖലകളിലേക്ക് വേഗത്തിൽ വികസിക്കുന്നതാണ് പ്രവാസി തൊഴിലവസരങ്ങൾ കൂടുവാൻ പ്രധാന കാരണം. മേഖലയിൽ നടന്നുവരുന്ന വൻകിട അടിസ്ഥാന സൗകര്യ വികസനങ്ങൾ, നിർമ്മാണം, ടൂറിസം, സാങ്കേതികവിദ്യ, ആരോഗ്യ മേഖല എന്നിവയിലെല്ലാം വിദേശ തൊഴിലാളികളുടെ ആവശ്യകത ശക്തമായി തുടരുന്നത് പണമൊഴുക്കിന് ആക്കം കൂട്ടി.
വിദേശ പണമയക്കലിൽ മുന്നിലുണ്ടായിരുന്ന അമേരിക്കയെ വളരെ പിന്നിലാക്കിയാണ് ജിസിസി മേഖല ഈ അപൂർവ്വ നേട്ടം സ്വന്തമാക്കിയത്. 2025-ൽ അമേരിക്കയിൽ നിന്ന് പുറത്തേക്ക് പോയത് 107 ബില്യൺ ഡോളറാണ്. ജിസിസി രാജ്യങ്ങളുടെ മൊത്തം ആഭ്യന്തര ഉത്പ്പാദനത്തിന്റെ (ജിഡിപി) 6.6 ശതമാനത്തോളം വരും ഈ പണമൊഴുക്ക്. പ്രവാസി കുടുംബങ്ങളുടെ സാമ്പത്തിക ഭദ്രത ഉറപ്പാക്കുന്നതിനും മാതൃരാജ്യങ്ങളിലെ സാമ്പത്തിക സുസ്ഥിരത നിലനിർത്തുന്നതിനും ഈ പണമൊഴുക്ക് വലിയ പങ്കാണ് വഹിക്കുന്നത്.
