മലപ്പുറം: മഞ്ചേരി പന്തല്ലൂരില് ഞാവല്പ്പഴം പറിക്കാൻ മരത്തിൽ കയറുന്നതിനിടെ കാൽ വഴുതി വീണ് ഏഴാം ക്ലാസ് വിദ്യാര്ത്ഥി മരിച്ചു. പന്തല്ലൂര് കടമ്പോടിലെ ബിസ്മി ഡ്രൈവിങ് സ്കൂള് ജീവനക്കാരി പുളിക്കല് റുഷ്ദയുടെയും വെള്ളില സ്വദേശി ജാഫറിന്റെയും മകന് അഹില് ഷാന് (13) ആണ് മരണപ്പെട്ടത്. പന്തല്ലൂര് ജി.യു.പി സ്കൂളിലെ ഏഴാം ക്ലാസ് വിദ്യാര്ത്ഥിയായിരുന്നു.
ഞാവല്പ്പഴം പറിക്കാനായി മരത്തില് കയറിയ അഹില് ഷാന്, മുകളില് വെച്ച് അബദ്ധത്തില് കാല്വഴുതി നിലത്തേക്ക് വീഴുകയായിരുന്നു. ഗുരുതരമായി പരുക്കേറ്റ കുട്ടിയെ ഉടന് തന്നെ ബന്ധുക്കളും നാട്ടുകാരും ചേര്ന്ന് മഞ്ചേരി ഗവ. മെഡിക്കല് കോളേജ് ആശുപത്രിയില് എത്തിച്ചു.
വിദഗ്ദ്ധ ചികിത്സയ്ക്കായി പെരിന്തല്മണ്ണയിലെ സ്വകാര്യ ആശുപത്രിയിലേക്ക് മാറ്റിയെങ്കിലും ജീവന് രക്ഷിക്കാനായില്ല.നിയമപരമായ പോസ്റ്റ്മോര്ട്ടം നടപടികള് പൂര്ത്തിയാക്കിയ ശേഷം മൃതദേഹം ബന്ധുക്കള്ക്ക് വിട്ടുനല്കി. പന്തല്ലൂര് ജുമാ മസ്ജിദ് ഖബര്സ്ഥാനില് ഖബറടക്കി.
