തിരുവനന്തപുരം: നെടുമ്പാശേരി അപകടത്തിൽ ആഭ്യന്തരമന്ത്രി ശക്തമായ നിലപാട് സ്വീകരിച്ചിട്ടും പൊലീസിന്റെ മനോഭാവത്തിൽ മാറ്റമുണ്ടായില്ലെന്ന് പ്രതിപക്ഷ നേതാവ് പിണറായി വിജയൻ. ചേരാനല്ലൂരിൽ കണ്ടതും ഇതേ സമീപനമാണെന്നും സമ്പന്നർക്കും സ്വാധീനമുള്ളവർക്കും സാധാരണക്കാർക്കും വ്യത്യസ്ത നീതിയാണോ ലഭിക്കുന്നതെന്ന ചോദ്യം ഗൗരവമായി കാണണമെന്നും അദ്ദേഹം നിയമസഭയിൽ ആവശ്യപ്പെട്ടു.
സമ്പന്നർക്കും സാധാരണക്കാർക്കും രണ്ട് നീതിയാണോ എന്ന ജയപാലകൃഷ്ണന്റെ മകളുടെ ചോദ്യം ഗൗരവമുള്ളതാണെന്ന് പിണറായി പറഞ്ഞു. ആഭ്യന്തരമന്ത്രിയുടെ വാക്കും നിലപാടും പോലും പൊലീസ് അംഗീകരിക്കാത്ത സാഹചര്യമാണുള്ളതെന്നും അദ്ദേഹം വിമർശിച്ചു. സംഭവത്തിൽ കുടുംബത്തിന് ഇത്തരമൊരു ചോദ്യം ഉന്നയിക്കേണ്ടിവന്നത് സങ്കടകരവും അപമാനകരവുമാണ്. പൊലീസിലുള്ള വിശ്വാസം നഷ്ടപ്പെടുന്ന തരത്തിലുള്ള പ്രതികരണങ്ങളാണ് ഇത്തരം സംഭവങ്ങളിലൂടെ ഉണ്ടാകുന്നതെന്നും പിണറായി വിജയൻ പറഞ്ഞു. സമ്പന്നർക്കും പാവപ്പെട്ടവർക്കും വ്യത്യസ്ത നീതിയെന്ന നിലപാടിനോട് സർക്കാരിന് യോജിപ്പില്ലെന്ന് പറയുമ്പോഴും വിഷയം ഗൗരവത്തോടെ പരിശോധിക്കണമെന്നും അദ്ദേഹം ആവശ്യപ്പെട്ടു.
