ദുബൈ: യുഎഇയിൽ വേനൽച്ചൂട് കനക്കുന്നതായി ദേശീയ കാലാവസ്ഥാ കേന്ദ്രം അറിയിച്ചു. ഇന്ന് രാജ്യത്ത് പൊതുവെ തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥയായിരിക്കും അനുഭവപ്പെടുക. പകൽ സമയത്ത് അബൂദബിയിൽ താപനില 45°C വരെ ഉയർന്നേക്കാം. 32°C ആകും കുറഞ്ഞ താപനില. ഷാർജയിൽ ഉയർന്ന താപനില 43°C ഉം ദുബൈയിൽ 38°C ഉം ആയിരിക്കും. പ്രദേശങ്ങളിൽ കുറഞ്ഞ താപനില 31°C ആയിരിക്കും. എന്നാൽ രാജ്യത്തിന്റെ കിഴക്കൻ, തെക്കൻ പ്രദേശങ്ങളിൽ മഴ മേഘങ്ങൾ രൂപപ്പെടാൻ സാധ്യതയുണ്ടെന്നും കാലാവസ്ഥാ കേന്ദ്രം പറയുന്നു. തീരദേശ നഗരങ്ങളിൽ കനത്ത അന്തരീക്ഷ ഈർപ്പം അനുഭവപ്പെടാം. അബൂദബിയിൽ 20 മുതൽ 60 ശതമാനം വരെയും, ഷാർജയിൽ 35 മുതൽ 70 ശതമാനം വരെയും ഹ്യുമിഡിറ്റി രേഖപ്പെടുത്തുമ്പോൾ ദുബൈയിൽ ഇത് 40 മുതൽ 80 ശതമാനം വരെ ഉയരാൻ സാധ്യതയുണ്ട്. മണിക്കൂറിൽ 10 മുതൽ 25 കിലോമീറ്റർ വേഗതയിൽ തെക്ക്-കിഴക്കൻ ദിശയിൽ നിന്ന് വടക്ക്-കിഴക്കൻ ദിശയിലേക്ക് നേരിയതോ മിതമായതോ ആയ കാറ്റ് വീശാൻ സാധ്യതയുണ്ട്. ചിലയിടങ്ങളിൽ കാറ്റിന്റെ വേഗത 35 കിലോമീറ്റർ വരെ ഉയരാൻ സാധ്യതയുള്ളതിനാൽ ഇത് പൊടിക്കാറ്റിന് കാരണമായേക്കാം. അറേബ്യൻ ഗൾഫിലും ഒമാൻ കടലിലും കടൽ ശാന്തമായിരിക്കുമെന്നും അധികൃതർ കൂട്ടിച്ചേർത്തു. ഇന്നലെ രാജ്യത്ത് കൂടുതൽ ചൂട് അനുഭവപ്പെട്ടത് അൽ ദഫ്രയിലെ മിസൈറയിലാണ്. വൈകിട്ട് 3 മണിക്ക് ഇവിടെ 46.9°C താപനില രേഖപ്പെടുത്തി.