ന്യൂഡൽഹി: വെറും 59 മിനിറ്റ് കൊണ്ട് ഡല്‍ഹിയില്‍ നിന്ന് ആഗ്രയില്‍ എത്തിച്ചേരാന്‍ കഴിയുന്ന നിര്‍ദ്ദിഷ്ട നോര്‍തേണ്‍ ബുള്ളറ്റ് ട്രെയിന്‍ കോറിഡോര്‍ പദ്ധതിക്ക് പ്രധാനമന്ത്രി നരേന്ദ്രമോദി അനുമതി നല്‍കിയതായി കേന്ദ്ര റെയില്‍വേ മന്ത്രി അശ്വിനി വൈഷ്ണവ്. പ്രധാന നഗരങ്ങളെ തമ്മില്‍ ബന്ധിപ്പിക്കുന്ന അതിവേഗ റെയില്‍ ശൃംഖല വടക്കേ ഇന്ത്യയിലെ പ്രധാന അടിസ്ഥാന സൗകര്യവികസന പദ്ധതിയാണ്. പദ്ധതി യാഥാര്‍ഥ്യമായാല്‍ ഡല്‍ഹിയില്‍ വെറും 59 മിനിറ്റ് കൊണ്ട് ആഗ്രയില്‍ എത്തിച്ചേരാന്‍ കഴിയുമെന്നും മന്ത്രി വ്യക്തമാക്കി.
പദ്ധതിയുടെ പ്രധാന സവിശേഷത യാത്രാസമയം കുറയുന്നു എന്നതാണ്. പ്രധാന നഗരങ്ങളെ തമ്മില്‍ ബന്ധിപ്പിച്ച് കൊണ്ടുള്ളതാണ് ഇടനാഴി. ഡല്‍ഹിയില്‍ നിന്ന് ലഖ്‌നൗവിലേക്കുള്ള യാത്രാ സമയം കുറയുന്നതിനൊപ്പം വാരാണസിയിലേക്കും കിഴക്കന്‍ മേഖലകളിലേക്കും കണക്ടിവിറ്റി വ്യാപിപ്പിക്കാനും ഇത് സഹായിക്കും. മേക്ക് ഇന്‍ ഇന്ത്യ പദ്ധതിക്ക് മുന്‍ഗണന നല്‍കി തൂണുകള്‍ മുതല്‍ ഗര്‍ഡറുകള്‍ വരെയുള്ള നിര്‍മ്മാണ പ്രവര്‍ത്തനങ്ങള്‍ പൂര്‍ണമായി തദ്ദേശീയമായിരിക്കുമെന്നും മന്ത്രി പറഞ്ഞു.
ഡല്‍ഹിയില്‍ നിന്ന് മൂന്നര മണിക്കൂര്‍ കൊണ്ട് വാരാണസി എത്താന്‍ കഴിയുന്നതാണ് നിര്‍ദ്ദിഷ്ട നോര്‍ത്തേണ്‍ ബുള്ളറ്റ് ട്രെയിന്‍ കോറിഡോര്‍ പദ്ധതി. ഇതിന്റെ ആദ്യ ഘട്ടമാണ് ഡല്‍ഹി- ആഗ്ര. ഡല്‍ഹിയില്‍ നിന്ന് കാന്‍പൂര്‍ എത്താന്‍ ഒരു മണിക്കൂറും 45 മിനിറ്റും മതിയാവും. ഡല്‍ഹിയില്‍ നിന്ന് രണ്ടു മണിക്കൂറും 12 മിനിറ്റും കൊണ്ട് ലഖ്‌നൗവില്‍ എത്തിച്ചേരാന്‍ സാധിക്കുമെന്നും മന്ത്രി പറഞ്ഞു. വിമാനയാത്രയെ അപേക്ഷിച്ച് കൂടുതല്‍ ലളിതവും സൗകര്യപ്രദവും ചെലവ് കുറഞ്ഞതുമായ യാത്രാമാര്‍ഗ്ഗമായിരിക്കും ഇതെന്ന് യുപി മുഖ്യമന്ത്രി യോഗി ആദിത്യനാഥ് പറഞ്ഞു.
