തിരുവനന്തപുരം: പിഎസ്‌സി പരീക്ഷാ ക്രമക്കേടുമായി ബന്ധപ്പെട്ട അന്വേഷണം മുൻ ചെയർമാൻ എം.കെ. സക്കീറിലേക്കും. സക്കീർ ചെയർമാനായിരുന്ന കാലത്ത് നടന്ന രണ്ട് പരീക്ഷകളിലും ക്രമക്കേട് നടന്നതായി പരാതിയുയർന്നതോടെയാണ് അന്വേഷണ സംഘം അദ്ദേഹത്തെ ചോദ്യം ചെയ്യാനൊരുങ്ങുന്നത്. ഫിഷറീസ് എക്സ്റ്റൻഷൻ ഓഫീസർ, ഖാദി ബോർഡ് ഇൻസ്പെക്ടർ പരീക്ഷകളിലാണ് ക്രമക്കേട് സംശയിക്കുന്നത്. ഇതുമായി ബന്ധപ്പെട്ട് പ്രത്യേക അന്വേഷണസംഘം എം.കെ. സക്കീറിന് നോട്ടീസ് നൽകും.
കേസുമായി ബന്ധപ്പെട്ട് നേരത്തെ നിലവിലെ പിഎസ്‌സി ചെയർമാൻ എം.ആർ. ബൈജുവിനെ പ്രതി ചേർത്തിരുന്നു. ഫിഷറീസ് എക്സ്റ്റൻഷൻ ഓഫീസർ നിയമനവുമായി ബന്ധപ്പെട്ട ക്രമക്കേടിലാണ് നടപടി. പിഎസ്‌സി അംഗങ്ങളെയും കേസിൽ പ്രതികളാക്കിയിട്ടുണ്ട്. ഇഷ്ടക്കാർക്ക് നിയമനം നൽകി പ്രതികൾ അന്യായമായ നേട്ടമുണ്ടാക്കിയെന്നാണ് അന്വേഷണ സംഘത്തിന്റെ കണ്ടെത്തൽ.
അധികാരദുർവിനിയോഗം നടത്തി യോഗ്യതയില്ലാത്തവർക്ക് നിയമനം നൽകിയെന്നും ഇതിലൂടെ പിഎസ്‌സിയുടെ വിശ്വാസ്യതയ്ക്ക് കോട്ടം വരുത്തിയെന്നുമാണ് എഫ്ഐആറിലെ ആരോപണം. പരീക്ഷാ നടത്തിപ്പിലും നിയമന നടപടികളിലും ക്രമക്കേട് നടന്നിട്ടുണ്ടോയെന്നതടക്കമുള്ള കാര്യങ്ങൾ അന്വേഷണ സംഘം പരിശോധിച്ചുവരികയാണ്.
മുൻ ചെയർമാൻ എം.കെ. സക്കീറിന്റെ കാലത്ത് നടന്ന പരീക്ഷകളുമായി ബന്ധപ്പെട്ട പരാതികൾ കൂടി അന്വേഷണത്തിന്റെ പരിധിയിൽ വന്നതോടെ അന്വേഷണം കൂടുതൽ വ്യാപിക്കുകയാണ്. കഴിഞ്ഞ നിയമസഭാ തെരഞ്ഞെടുപ്പിൽ പൊന്നാനിയിലെ എൽഡിഎഫ് സ്ഥാനാർഥിയായിരുന്നു എം.കെ. സക്കീർ. അദ്ദേഹത്തെ ചോദ്യം ചെയ്തശേഷം കൂടുതൽ നടപടികൾ സ്വീകരിക്കാനാണ് അന്വേഷണ സംഘത്തിന്റെ നീക്കം.
