ന്യൂഡൽഹി: അടുത്ത നിയമസഭാ തിരഞ്ഞെടുപ്പോടെ ഉത്തർപ്രദേശിൽ ബിജെപി സർക്കാരിന് അധികാരം നഷ്ടപ്പെടുമെന്നും പുതിയ രാഷ്ട്രീയ സാഹചര്യം രൂപപ്പെടുമെന്നും സമാജ്വാദി പാർട്ടി അധ്യക്ഷൻ അഖിലേഷ് യാദവ്. സംസ്ഥാനത്ത് ഭരണമാറ്റം ഉണ്ടാകുമെന്നും പുതിയ ഭരണവും പുതിയ യാഥാർഥ്യവുമായിരിക്കും വരാനിരിക്കുന്നതെന്നും അദ്ദേഹം പറഞ്ഞു. ഹിന്ദുസ്ഥാൻ ടൈംസ് ലീഡർഷിപ്പ് ഉച്ചകോടിയിൽ സംസാരിക്കുകയായിരുന്നു മുൻ മുഖ്യമന്ത്രി.
മുഖ്യമന്ത്രി യോഗി ആദിത്യനാഥിന്റെ നേതൃത്വത്തിലുള്ള സർക്കാരിനെതിരെ രൂക്ഷവിമർശനമാണ് അഖിലേഷ് ഉന്നയിച്ചത്. സംസ്ഥാനത്തെ ക്രമസമാധാനനില മോശമായെന്നും ദളിതർക്കും സ്ത്രീകൾക്കും ന്യൂനപക്ഷങ്ങൾക്കുമെതിരായ കുറ്റകൃത്യങ്ങൾ വർധിച്ചെന്നുമായിരുന്നു ആരോപണം. കുറ്റകൃത്യങ്ങൾക്കെതിരെ ശക്തമായ നടപടിയെടുക്കുന്നുവെന്ന സർക്കാരിന്റെ അവകാശവാദം യാഥാർഥ്യവുമായി പൊരുത്തപ്പെടുന്നില്ലെന്നും അദ്ദേഹം പറഞ്ഞു.
ബുൾഡോസർ നടപടി ക്രമസമാധാനം ഉറപ്പാക്കാനുള്ള മാർഗമല്ലെന്നും ദരിദ്രരുടെയും പാർശ്വവൽക്കരിക്കപ്പെട്ടവരുടെയും വീടുകളാണ് ഇതിലൂടെ കൂടുതലായി ലക്ഷ്യമിടുന്നതെന്നും അഖിലേഷ് ആരോപിച്ചു.
വരാനിരിക്കുന്ന തിരഞ്ഞെടുപ്പിൽ കോൺഗ്രസിന്റെ സീറ്റ് ആവശ്യത്തെക്കുറിച്ചും അദ്ദേഹം പ്രതികരിച്ചു. 180 സീറ്റുകളേക്കാൾ ഒരു സീറ്റ് അധികമാണ് കോൺഗ്രസ് ആവശ്യപ്പെട്ടതെന്ന് അഖിലേഷ് വെളിപ്പെടുത്തി.
അയോധ്യ രാമക്ഷേത്രത്തിലെ കാണിക്കപ്പണം ദുരുപയോഗം ചെയ്തെന്ന ആരോപണവും തിരഞ്ഞെടുപ്പിൽ പ്രധാന ചർച്ചയാകുമെന്ന് അദ്ദേഹം പറഞ്ഞു. സംഭവത്തിൽ ഭക്തർക്കിടയിൽ അതൃപ്തിയുണ്ടെന്നും അത് വോട്ടെടുപ്പിൽ പ്രതിഫലിക്കുമെന്നുമാണ് അഖിലേഷിന്റെ വിലയിരുത്തൽ.
2027ന്റെ തുടക്കത്തിൽ ഉത്തർപ്രദേശിൽ നിയമസഭാ തിരഞ്ഞെടുപ്പ് നടക്കാനിരിക്കെയാണ് അഖിലേഷിന്റെ പരാമർശങ്ങൾ. അടുത്ത വർഷം തിരഞ്ഞെടുപ്പ് നടക്കുന്ന അഞ്ച് സംസ്ഥാനങ്ങളിൽ ഒന്നാണ് ഉത്തർപ്രദേശ്.



