തിരുവനന്തപുരം: വാഹന നികുതി കുടിശ്ശികയുള്ളവർക്ക് ആശ്വാസവുമായി കേരള സർക്കാർ. കുടിശ്ശിക തീർക്കുന്നതിനായി ഒറ്റത്തവണ തീർപ്പാക്കൽ പദ്ധതിയാണ് സർക്കാർ അവതരിപ്പിച്ചിരിക്കുന്നത്. വർഷങ്ങളായി നികുതി അടയ്ക്കാൻ കഴിയാതെ ബുദ്ധിമുട്ടുന്ന വാഹന ഉടമകൾക്ക് സാമ്പത്തിക ബാധ്യത കുറയ്ക്കാൻ ഈ പദ്ധതി സഹായകമാകും. പദ്ധതി പ്രകാരം സ്വകാര്യ വാഹന ഉടമകൾക്ക് നാല് വർഷത്തെ കുടിശ്ശികയുടെ 40 ശതമാനവും ട്രാൻസ്‌പോർട്ട് വാഹന ഉടമകൾക്ക് 30 ശതമാനവും അടച്ച് കുടിശ്ശിക തീർക്കാൻ അവസരമുണ്ട്.
2026 മാർച്ച് 31 വരെയുള്ള കുടിശ്ശികയ്ക്കാണ് ഈ ഇളവ് ബാധകമാകുന്നത്. പദ്ധതിയുടെ ആനുകൂല്യം 2027 മാർച്ച് 31 വരെ പ്രയോജനപ്പെടുത്താം. ദീർഘകാലമായി നികുതി കുടിശ്ശികയുള്ളവർക്കും സാമ്പത്തിക ബുദ്ധിമുട്ട് കാരണം പണം അടയ്ക്കാൻ കഴിയാത്തവർക്കും ഈ പദ്ധതി ആശ്വാസമാകുമെന്നാണ് പ്രതീക്ഷ. എന്നാൽ, എല്ലാ വാഹനങ്ങൾക്കും ഒരേ രീതിയിലാണോ ഇളവ് ലഭിക്കുക എന്നതടക്കമുള്ള കാര്യങ്ങൾ ഔദ്യോഗിക നിബന്ധനകൾ അനുസരിച്ചായിരിക്കും.
