തിരുവനന്തപുരം: കൊവിഡ് കാലത്ത് ആരോഗ്യവകുപ്പ് വാങ്ങിയ ഐഫോണുകളിൽ ചിലത് കാണാനില്ലെന്ന പരാതിയിൽ വിജിലൻസ് അന്വേഷണം ആവശ്യപ്പെട്ട് ആരോഗ്യമന്ത്രി കെ. മുരളീധരൻ. ഇതുസംബന്ധിച്ച് ആഭ്യന്തരമന്ത്രി രമേശ് ചെന്നിത്തലയ്ക്ക് കത്ത് നൽകി. ആരോഗ്യവകുപ്പിന്റെ സൈബർ സെല്ലിലും പരാതി നൽകും. ഐഎംഇഐ നമ്പർ ഉപയോഗിച്ച് ഫോണുകൾ എവിടെയാണെന്ന് കണ്ടെത്താനാണ് നീക്കം.

കണ്ണുപരിശോധനയ്ക്കായി 224 ഫണ്ടസ് ക്യാമറകളും അവയ്ക്കൊപ്പം ഉപയോഗിക്കാൻ 224 ഐഫോണുകളുമാണ് വാങ്ങിയത്. എന്നാൽ, കൊവിഡ് കാലത്ത് വാങ്ങിയ ഉപകരണങ്ങൾ ഉപയോഗിച്ചില്ലെന്നാണ് ആരോഗ്യവകുപ്പിന്റെ കണ്ടെത്തൽ. ഫണ്ടസ് ക്യാമറകളും ഐഫോണുകളും വാങ്ങാൻ ആകെ 7.16 കോടി രൂപ ചെലവഴിച്ചതായാണ് വിവരം.

റെമഡിയോ ഇന്നവേറ്റീവ് സൊല്യൂഷൻ എന്ന കമ്പനിയിൽനിന്നാണ് ഫണ്ടസ് ക്യാമറകൾ വാങ്ങിയത്. ഐഫോൺ 6എസ് മോഡലിലുള്ള 224 ഫോണുകളാണ് വാങ്ങിയത്. ഒരു ഫണ്ടസ് ക്യാമറയും ഐഫോണും ഉൾപ്പെടുന്ന ഉപകരണത്തിന് 3.2 ലക്ഷം രൂപ ചെലവായെന്നും റിപ്പോർട്ടിൽ പറയുന്നു.

നിയമസഭയിൽ ചോദ്യത്തിന് മറുപടി നൽകവെയാണ് ഐഫോണുകൾ ഉൾപ്പെടെയുള്ള ഉപകരണങ്ങൾ കാണാനില്ലെന്ന പരാതി ലഭിച്ചതായി ആരോഗ്യമന്ത്രി വ്യക്തമാക്കിയത്. അബിൻ വർക്കി എംഎൽഎയുടെ ചോദ്യത്തിനായിരുന്നു മറുപടി. വാങ്ങിയ ഫണ്ടസ് ക്യാമറകളും ഐഫോണുകളും പല ആശുപത്രികളിലും ഉപയോഗിക്കുന്നില്ലെന്നും ചില ഫോണുകൾ കാണാനില്ലെന്ന പരാതിയുണ്ടെന്നും മന്ത്രി അറിയിച്ചു.