കൽപ്പറ്റ: മുണ്ടക്കൈ-ചൂരൽമല ഉരുൾപൊട്ടൽ ദുരന്തബാധിതരുടെ പുനരധിവാസത്തിനായി കൽപ്പറ്റയിൽ നിർമിക്കുന്ന ടൗൺഷിപ്പിൽ രണ്ടാംഘട്ടത്തിൽ 149 കുടുംബങ്ങൾക്ക് കൂടി വീടുകൾ അനുവദിച്ചു. ശനിയാഴ്ച നടന്ന നറുക്കെടുപ്പിലൂടെയാണ് ഗുണഭോക്താക്കളെ തിരഞ്ഞെടുത്തത്. ഫേസ് 2എ, ഫേസ് 2ബി, അപ്പീൽ പട്ടിക എന്നിവയിൽ ഉൾപ്പെട്ടവർക്കാണ് രണ്ടാംഘട്ടത്തിൽ വീടുകൾ ലഭിച്ചത്. കൃഷിമന്ത്രി ടി. സിദ്ദിഖിന്റെ അധ്യക്ഷതയിൽ നടന്ന ചടങ്ങിൽ റവന്യൂ മന്ത്രി എ.പി. അനിൽകുമാറും പങ്കെടുത്തു.
രണ്ടാംഘട്ടത്തിൽ സോൺ ഒന്നിൽ 23 വീടുകളും സോൺ മൂന്നിൽ ആറ് വീടുകളും സോൺ നാലിൽ 14 വീടുകളും സോൺ അഞ്ചിൽ 106 വീടുകളുമാണ് അനുവദിച്ചത്. നവംബറോടെ വീടുകൾ ഗുണഭോക്താക്കൾക്ക് കൈമാറാനാണ് തീരുമാനം. ആദ്യഘട്ടത്തിൽ 178 വീടുകൾ കൈമാറിയിരുന്നു. രണ്ടാംഘട്ടം കൂടി പൂർത്തിയാകുന്നതോടെ ടൗൺഷിപ്പിൽ ആകെ 327 കുടുംബങ്ങൾക്ക് വീടുകൾ ലഭിക്കും.
നവംബർ 20 വരെ വീടുകളുടെ നിർമാണം തുടരും. തുടർന്ന് ഗുണഭോക്താക്കളുടെ യോഗം ചേർന്ന് വീടുകൾ നേരിട്ട് സന്ദർശിക്കാൻ അവസരമൊരുക്കും. വീടുകളുമായി ബന്ധപ്പെട്ട പരാതികൾ എഴുതി നൽകാനും സൗകര്യമുണ്ടാകും. വാടകവീടുകളിൽ കഴിയുന്ന ദുരന്തബാധിതർക്കുള്ള ജീവനോപാധി ധനസഹായം ഡിസംബർ വരെ നീട്ടിയതായി റവന്യൂ മന്ത്രി എ.പി. അനിൽകുമാർ അറിയിച്ചു. ദുരന്തബാധിതരുടെ പുനരധിവാസം പൂർണമാക്കുന്നതിനാണ് സർക്കാർ ശ്രമിക്കുന്നതെന്നും അർഹരായവർക്ക് തുടർന്നുള്ള ഘട്ടങ്ങളിലും വീടുകൾ അനുവദിക്കുമെന്നും അദ്ദേഹം വ്യക്തമാക്കി.
നറുക്കെടുപ്പിനായി ഹാളിൽ സ്ഥാപിച്ച ഗ്ലാസ് പെട്ടിയിൽനിന്ന് ഗുണഭോക്താക്കൾ നറുക്കുകൾ എടുക്കുകയായിരുന്നു. സോൺ നമ്പർ, ഇംഗ്ലീഷ് അക്ഷരത്തിൽ രേഖപ്പെടുത്തിയ ക്ലസ്റ്റർ, വീടിന്റെ ക്രമനമ്പർ എന്നിവയാണ് ഓരോ നറുക്കിലും ഉൾപ്പെടുത്തിയിരുന്നത്. ചൂരൽമല എടത്തറ വീട്ടിൽ മജീദാണ് ആദ്യ നറുക്കെടുത്തത്. സോൺ അഞ്ചിലെ ക്ലസ്റ്റർ ബിയിൽ 332-ാം നമ്പർ വീടാണ് അദ്ദേഹത്തിന് ലഭിച്ചത്.
വീടുകൾ അനുവദിച്ചതിന് പിന്നാലെ വിവരങ്ങൾ പരിശോധിക്കാനും ആവശ്യമായ സേവനങ്ങൾ ലഭ്യമാക്കാനും ജില്ലാ ഭരണകൂടം പ്രത്യേക കൗണ്ടറുകൾ ഒരുക്കിയിരുന്നു. ഉടമസ്ഥാവകാശ സർട്ടിഫിക്കറ്റ്, വിലാസം തിരുത്തൽ, റേഷൻ കാർഡ് നടപടികൾ, വൈദ്യുതി, കുടിവെള്ള കണക്ഷനുകൾ എന്നിവയ്ക്കായി 16 കൗണ്ടറുകളാണ് സജ്ജീകരിച്ചത്. കെഎസ്ഇബി, നഗരസഭ, വാട്ടർ അതോറിറ്റി എന്നിവയുടെ ഏകോപനത്തിലായിരുന്നു ക്രമീകരണങ്ങൾ. 149 വീടുകളിലും കുടിവെള്ള കണക്ഷൻ നൽകുന്നതിനുള്ള നടപടികൾ പൂർത്തിയായതായി വാട്ടർ അതോറിറ്റി അറിയിച്ചു.
