ഇന്ത്യയിൽ 5000 വർഷങ്ങൾക്ക് മുമ്പുതന്നെ പറക്കും കാറുകൾ ഉണ്ടായിരുന്നുവെന്ന് നടൻ രൺബീർ കപൂർ. രാമായണത്തിലെ പുഷ്പക വിമാനത്തെ പരാമർശിച്ചുകൊണ്ടായിരുന്നു രൺബീറിന്റെ പ്രതികരണം. എലോൺ മസ്ക് അടുത്തിടെ പറക്കും കാർ അവതരിപ്പിച്ചപ്പോൾ ഇന്ത്യയിൽ ഇതിന് സമാനമായ സാങ്കേതികവിദ്യ 5000 വർഷങ്ങൾക്ക് മുമ്പേ ഉണ്ടായിരുന്നുവെന്നാണ് രൺബീർ പറഞ്ഞത്.
നിതേഷ് തിവാരി സംവിധാനം ചെയ്യുന്ന ‘രാമായണം’ സിനിമയുടെ പ്രചാരണത്തിന്റെ ഭാഗമായി നടന്ന അഭിമുഖത്തിലായിരുന്നു താരത്തിന്റെ പരാമർശം. രൺബീറിനൊപ്പം രവി ദുബെ, രാകുൽ പ്രീത് സിങ്, യാഷ് എന്നിവരും അഭിമുഖത്തിൽ പങ്കെടുത്തു. പുരാതന കാലത്ത് ഉപയോഗിച്ചിരുന്ന ആയുധങ്ങളുടെയും സാങ്കേതികവിദ്യകളുടെയും അത്ഭുതകരമായ സവിശേഷതകളെക്കുറിച്ച് അവതാരക സംസാരിച്ചതിന് പിന്നാലെയാണ് പുഷ്പക വിമാനത്തെക്കുറിച്ച് രൺബീർ പരാമർശിച്ചത്. ചിത്രത്തിലെ വിഷ്വൽ എഫക്ട്സിന് പിന്നിൽ പ്രവർത്തിച്ച ഓസ്കർ പുരസ്കാര ജേതാക്കളായ ഡിഎൻഇജി സ്റ്റുഡിയോയെയും അവതാരക പ്രശംസിച്ചു.
ടെസ്‌ലയുടെ പുതിയ റോഡ്സ്റ്റർ അവതരിപ്പിച്ചതുമായി ബന്ധപ്പെടുത്തിയാണ് രൺബീർ പുഷ്പക വിമാനത്തെക്കുറിച്ച് സംസാരിച്ചത്. ടെക്സസിലെ സ്പേസ് എക്സ് കേന്ദ്രത്തിൽ നടന്ന പ്രദർശനത്തിൽ വാഹനം വളഞ്ഞ റാമ്പിലൂടെ തലകീഴായി സഞ്ചരിക്കുകയും കുറച്ചുനേരം വായുവിൽ തങ്ങിനിന്ന ശേഷം സുരക്ഷിതമായി നിലത്തിറങ്ങുകയും ചെയ്തിരുന്നു. വാഹനം വിജയകരമായി ലാൻഡ് ചെയ്തതിന് പിന്നാലെ ‘അത് പ്രവർത്തിച്ചു’ എന്നായിരുന്നു എലോൺ മസ്കിന്റെ പ്രതികരണം. 2028ൽ ഉൽപ്പാദനം ആരംഭിക്കുമെന്നാണ് മസ്ക് അറിയിച്ചിരിക്കുന്നത്.
അതേസമയം, രാമായണത്തിന്റെ പുതിയ ദൃശ്യാവിഷ്കാരം മനോഹരമാണെന്നും ഇന്നത്തെ കാലത്തും ഈ ഇതിഹാസത്തിന് പ്രസക്തിയുണ്ടെന്നും നടൻ യാഷ് പറഞ്ഞു. ചിത്രത്തിന്റെ ട്രെയിലറിൽ ശ്രദ്ധ നേടിയ പ്രധാന ദൃശ്യങ്ങളിലൊന്നാണ് പുഷ്പക വിമാനം.
ഹിന്ദു ഇതിഹാസമായ രാമായണത്തിൽ സ്വയം സഞ്ചരിക്കുന്ന ആകാശരഥമായാണ് പുഷ്പക വിമാനത്തെ വിശേഷിപ്പിക്കുന്നത്. ദേവശില്പിയായ വിശ്വകർമ്മാവ് ബ്രഹ്മാവിനായി നിർമിച്ച വിമാനം പിന്നീട് സമ്പത്തിന്റെ ദേവനായ കുബേരന് സമ്മാനിച്ചുവെന്നാണ് ഐതിഹ്യം. കുബേരനെ പരാജയപ്പെടുത്തിയ രാവണൻ ഈ വിമാനം സ്വന്തമാക്കുകയായിരുന്നു. ചിന്തയുടെ വേഗത്തിൽ സഞ്ചരിക്കാനും യാത്രക്കാരുടെ എണ്ണത്തിനനുസരിച്ച് വലുപ്പം വർധിപ്പിക്കാനും കഴിയുന്ന ആകാശമന്ദിരമായാണ് പുഷ്പക വിമാനത്തെ രാമായണത്തിൽ വിവരിക്കുന്നത്.
