കൊച്ചി: യുവനടിയുടെ ബന്ധു നൽകിയ പീഡനപരാതിയിൽ കേസെടുത്തതിന് പിന്നാലെ ഒളിവിൽ പോയ കൊച്ചിയിലെ ഡോക്ടർ ജോൺസൺ കെ. വർഗീസിനെതിരെ പൊലീസ് ലുക്കൗട്ട് സർക്കുലർ പുറത്തിറക്കി. പ്രതി വിദേശത്തേക്ക് കടന്നതായാണ് അന്വേഷണസംഘത്തിന്റെ സംശയം. ഇയാളെ കണ്ടെത്തുന്നതിനും രാജ്യം വിടുന്നത് തടയുന്നതിനുമുള്ള നടപടികളുടെ ഭാഗമായാണ് ലുക്കൗട്ട് സർക്കുലർ പുറപ്പെടുവിച്ചത്.

അതിനിടെ, ഡോക്ടറുടെ മൊബൈൽഫോണിൽനിന്ന് നിരവധി യുവതികളുടെ സ്വകാര്യദൃശ്യങ്ങൾ കണ്ടെത്തിയതായും പൊലീസ് അറിയിച്ചു. ഏകദേശം 12 യുവതികളുടെ ദൃശ്യങ്ങളാണ് ഫോണിൽനിന്ന് കണ്ടെടുത്തത്. യുവതികളുമായുള്ള സ്വകാര്യനിമിഷങ്ങൾ ഡോക്ടർ മൊബൈൽഫോണിൽ പകർത്തി സൂക്ഷിച്ചിരുന്നതായാണ് പൊലീസിന്റെ പ്രാഥമിക കണ്ടെത്തൽ. ദൃശ്യങ്ങളിൽ ഉൾപ്പെട്ട യുവതികൾ പരാതിയുമായി മുന്നോട്ടുവന്നാൽ ഡോക്ടർക്കെതിരെ കൂടുതൽ കേസുകൾ രജിസ്റ്റർ ചെയ്യുമെന്നും പൊലീസ് വ്യക്തമാക്കിയിട്ടുണ്ട്.

യുവനടിയും സുഹൃത്തായ നടനും ഉൾപ്പെടെ 12 പേരടങ്ങുന്ന സംഘം ഡോക്ടറെ ആക്രമിച്ച് മൊബൈൽഫോണുകളും സ്മാർട് വാച്ചും ഇയർപോഡും ഉൾപ്പെടെ 3.25 ലക്ഷം രൂപയുടെ സാധനങ്ങൾ കവർന്നെന്ന പരാതിയിലാണ് നേരത്തെ കേസെടുത്തിരുന്നത്. ചികിത്സ നൽകണമെന്ന പേരിൽ യുവനടിയുടെ ബന്ധുവായ സ്ത്രീയെ ഫ്ലാറ്റിലേക്ക് വിളിച്ചുവരുത്തി ക്രൂരമായി മർദിച്ചെന്നും തുടർന്ന് ഡോക്ടറുടെ ഫോണും മറ്റ് വിലപിടിപ്പുള്ള വസ്തുക്കളും കവർന്നെന്നുമായിരുന്നു ജോൺസൺ കെ. വർഗീസ് പൊലീസിന് നൽകിയ പരാതി.

ഈ പരാതിയിൽ അന്വേഷണം നടത്തിയ പൊലീസ് യുവനടിയെയും സുഹൃത്തായ നടനെയും മറ്റൊരാളെയും അറസ്റ്റ് ചെയ്തിരുന്നു. കേസിൽ ആകെ 12 പ്രതികളാണുള്ളത്. സംഭവത്തിനു പിന്നിൽ ഹണിട്രാപ്പോ ബ്ലാക്ക്മെയിലിങ്ങോ ഉണ്ടായിരുന്നോയെന്നും പൊലീസ് പരിശോധിച്ചിരുന്നു.

എന്നാൽ, ഡോക്ടറും ബന്ധുവായ സ്ത്രീയും തമ്മിലുണ്ടായിരുന്ന അടുപ്പത്തെച്ചൊല്ലിയുള്ള തർക്കമാണ് ആക്രമണത്തിലേക്ക് നയിച്ചതെന്നായിരുന്നു യുവനടിയുടെ മൊഴി. ഡോക്ടറുടെ ഫോണിലുണ്ടായിരുന്ന ബന്ധുവിന്റെ സ്വകാര്യദൃശ്യങ്ങൾ നീക്കം ചെയ്യാനാണ് ഫ്ലാറ്റിലേക്ക് വിളിച്ചുവരുത്തിയതെന്നും നടിയും മറ്റ് പ്രതികളും പൊലീസിനോട് പറഞ്ഞിരുന്നു. ദൃശ്യങ്ങൾ ഡിലീറ്റ് ചെയ്യുന്നതിനായാണ് ഡോക്ടറുടെ ഫോൺ പിടിച്ചുവാങ്ങിയതെന്നും ഇവർ മൊഴി നൽകിയിരുന്നു.

പിന്നാലെ പ്രതികൾ പൊലീസിന് കൈമാറിയ ഫോണുകൾ പരിശോധിച്ചപ്പോഴാണ് മറ്റ് യുവതികളുടെ സ്വകാര്യദൃശ്യങ്ങൾ കണ്ടെത്തിയത്. ഇതിനിടെ യുവനടിയുടെ ബന്ധുവായ സ്ത്രീ ഡോക്ടർക്കെതിരെ പീഡനപരാതി നൽകുകയായിരുന്നു. പരാതിയുടെ അടിസ്ഥാനത്തിൽ ജോൺസൺ കെ. വർഗീസിനെ പ്രതിയാക്കി പൊലീസ് കേസെടുത്തു. ഇതിനു പിന്നാലെയാണ് ഡോക്ടർ ഒളിവിൽ പോയത്.

ആക്രമണക്കേസിലെ പരാതിക്കാരനായിരുന്ന ഡോക്ടർ തന്നെ പിന്നീട് പീഡനക്കേസിൽ പ്രതിയായതോടെ അന്വേഷണം പുതിയ വഴിത്തിരിവിലെത്തിയിരിക്കുകയാണ്. സ്വകാര്യദൃശ്യങ്ങൾ സംബന്ധിച്ച ആരോപണങ്ങളിലും പീഡനപരാതിയിലും പൊലീസ് അന്വേഷണം തുടരുകയാണ്. പ്രതിയെ കണ്ടെത്താനുള്ള ശ്രമങ്ങളും ശക്തമാക്കിയിട്ടുണ്ട്.