വാഷിങ്ടൺ: എൻവിഡിയ മേധാവി ജെൻസൻ ഹുവാങ്ങുമായി ബന്ധപ്പെട്ട ചാരവിവാദം പുതിയ ചർച്ചകൾക്ക് വഴിവെച്ചതോടെ ഇലോൺ മസ്കിന്റെ പഴയ സോഷ്യൽ മീഡിയ പോസ്റ്റ് വീണ്ടും വൈറലാകുന്നു. ‘അവൾ 10ൽ 10 ആണെങ്കിൽ നീ ഒരു ചാരസംഘടനയുടെ സ്വത്താണ്’ എന്നായിരുന്നു മസ്കിന്റെ പരിഹാസരൂപത്തിലുള്ള പരാമർശം. 2025 ഒക്ടോബറിൽ പങ്കുവെച്ച പോസ്റ്റാണ് ഇപ്പോൾ വീണ്ടും ശ്രദ്ധ നേടുന്നത്.
ചൈനീസ്, റഷ്യൻ വനിതാ ചാരന്മാർ അമേരിക്കൻ സാങ്കേതിക മേഖലയിലെ പ്രമുഖരെ പ്രണയബന്ധങ്ങളിലൂടെ സ്വാധീനിച്ച് രഹസ്യവിവരങ്ങൾ ചോർത്താൻ ശ്രമിക്കുന്നുവെന്ന റിപ്പോർട്ടിനോടുള്ള പ്രതികരണമായാണ് മസ്ക് അന്ന് ഈ കുറിപ്പ് പങ്കുവെച്ചത്. സിലിക്കൺ വാലിയിലെ പ്രമുഖ സാങ്കേതിക വിദഗ്ധരെ ലക്ഷ്യമിട്ട് ഇത്തരം നീക്കങ്ങൾ നടക്കുന്നുവെന്നായിരുന്നു റിപ്പോർട്ടിലെ ആരോപണം.
എൻവിഡിയ സിഇഒ ജെൻസൻ ഹുവാങ്ങുമായി ബന്ധപ്പെട്ട പുതിയ വിവാദമാണ് മസ്കിന്റെ പഴയ പരാമർശത്തിന് വീണ്ടും പ്രസക്തി നൽകിയത്. ചൈനീസ് രഹസ്യാന്വേഷണ വിഭാഗവുമായി ബന്ധമുണ്ടെന്ന് അമേരിക്കൻ അധികൃതർ സംശയിക്കുന്ന ആലിസ് ഹുവാങ് എന്ന വനിതയുമായി ജെൻസന് അടുത്ത ബന്ധമുണ്ടായിരുന്നുവെന്നാണ് ന്യൂയോർക്ക് ടൈംസ് റിപ്പോർട്ട് ചെയ്തത്. സിംഗപ്പൂർ ആസ്ഥാനമായ മെഗാസ്പീഡ് കമ്പനിയിലെ മുൻ എക്സിക്യൂട്ടീവായിരുന്നു ഇവർ.
അതേസമയം, ഭാര്യയോട് അവിശ്വസ്തത കാട്ടിയതായി ജെൻസൻ ഹുവാങ് ജീവനക്കാർക്ക് അയച്ച സന്ദേശത്തിൽ സമ്മതിച്ചിരുന്നു. തന്റെ പ്രവൃത്തികളുടെ പൂർണ ഉത്തരവാദിത്തം ഏറ്റെടുക്കുന്നതായും അദ്ദേഹം വ്യക്തമാക്കി. എന്നാൽ ചാരബന്ധം സംബന്ധിച്ച ആരോപണങ്ങളിൽ ജെൻസൻ ഹുവാങ്ങിന്റെ പങ്ക് ഇതുവരെ സ്ഥിരീകരിച്ചിട്ടില്ല.
വിവാദത്തെ തുടർന്ന് എൻവിഡിയയുടെ ഡയറക്ടർ ബോർഡ് സ്വതന്ത്ര അന്വേഷണം പ്രഖ്യാപിച്ചിട്ടുണ്ട്. കമ്പനിയുടെ രഹസ്യവിവരങ്ങളോ അമേരിക്കയുടെ ദേശീയ സുരക്ഷയുമായി ബന്ധപ്പെട്ട വിവരങ്ങളോ ചോർന്നതായി കരുതാൻ നിലവിൽ കാരണമില്ലെന്നും എൻവിഡിയ വ്യക്തമാക്കിയിട്ടുണ്ട്.
വ്യക്തിബന്ധങ്ങൾ മുതൽ രാജ്യാന്തര ചാരപ്രവർത്തനം വരെ ചർച്ചയാകുന്ന വിവാദത്തിൽ അന്വേഷണം പുരോഗമിക്കുകയാണ്.
