മക്കൾക്കും കൊച്ചുമക്കൾക്കും വേണ്ടി സ്വന്തം സന്തോഷങ്ങളും സ്വാതന്ത്ര്യവും ത്യജിക്കുന്ന സ്ത്രീകൾക്ക് ശക്തമായ സന്ദേശവുമായി ഡബ്ബിംഗ് ആർട്ടിസ്റ്റ് ഭാഗ്യലക്ഷ്മി. മക്കൾക്ക് വേണ്ടി ജീവിതത്തിലെ എല്ലാ സന്തോഷങ്ങളും വേണ്ടെന്നുവയ്ക്കുന്നത് മണ്ടത്തരമാണെന്നാണ് ഭാഗ്യലക്ഷ്മിയുടെ അഭിപ്രായം. മക്കൾ സ്വാർത്ഥരാണെന്ന് തന്റെ രണ്ട് ആൺമക്കളും തന്നോട് പറഞ്ഞിട്ടുണ്ടെന്ന് ഭാഗ്യലക്ഷ്മി പറയുന്നു. മക്കൾ അവരുടെ ഇഷ്ടത്തിന് യാത്രകൾ പോകാറുണ്ടെന്നും തന്നെ കൂടെ കൊണ്ടുപോകണമെന്ന് നിർബന്ധമില്ലെന്നും താരം വ്യക്തമാക്കി.
തനിക്ക് യാത്ര ചെയ്യണമെന്ന് തോന്നിയാൽ ആരുടെയും അനുവാദത്തിന് കാത്തുനിൽക്കാതെ പോകും. സ്വന്തം ജീവിതം എങ്ങനെ ജീവിക്കണമെന്ന് തീരുമാനിക്കാനുള്ള സ്വാതന്ത്ര്യം തനിക്കുണ്ടെന്നും ഭാഗ്യലക്ഷ്മി പറഞ്ഞു. ത്യാഗം ചെയ്തിട്ട് പിന്നീട് അതോർത്ത് സങ്കടപ്പെടുന്നതിൽ കാര്യമില്ല. മരിച്ചശേഷം മക്കൾക്ക് കോടികൾ ലഭിക്കുന്ന ഇൻഷുറൻസിനായി പണം ചെലവഴിക്കുന്നതിനോടും തനിക്ക് യോജിപ്പില്ല. പകരം ആരോഗ്യപരിരക്ഷയ്ക്കും ദൈനംദിന ആവശ്യങ്ങൾക്കും സ്വന്തം യാത്രകൾക്കും സന്തോഷങ്ങൾക്കുമായി പണം മാറ്റിവയ്ക്കാനാണ് ആഗ്രഹിക്കുന്നതെന്നും താരം വ്യക്തമാക്കി.
മുൻപത്തെപ്പോലെ ഇപ്പോൾ ഡബ്ബിംഗ് ചെയ്യുന്നില്ലെന്നും സിനിമയിലും ജീവിതത്തിലും വന്ന മാറ്റങ്ങൾ അംഗീകരിച്ചാണ് മുന്നോട്ടുപോകുന്നതെന്നും ഭാഗ്യലക്ഷ്മി പറഞ്ഞു. എഴുത്തും യാത്രകളും സിനിമ കാണുന്നതുമെല്ലാമാണ് ഇപ്പോഴത്തെ സന്തോഷങ്ങൾ. മക്കളുമായി നല്ല ബന്ധമുണ്ടെങ്കിലും തന്റെ സ്വാതന്ത്ര്യത്തിൽ വിട്ടുവീഴ്ച ചെയ്യാൻ തയ്യാറല്ലെന്നും ഭാഗ്യലക്ഷ്മി വ്യക്തമാക്കി. ‘എന്റെ ഒരു സന്തോഷവും മക്കളുടെ കാൽക്കീഴിൽ കൊണ്ടുവയ്ക്കില്ല. അത് എന്റെ സന്തോഷമാണ്, എന്റെ അവകാശമാണ്. ഓരോ സ്ത്രീയും ഇത് തിരിച്ചറിയണം’ എന്ന ഭാഗ്യലക്ഷ്മിയുടെ വാക്കുകളാണ് ഇപ്പോൾ ശ്രദ്ധ നേടുന്നത്.
