മമ്മൂട്ടിയും ധനുഷും ആദ്യമായി ഒന്നിക്കുന്ന ‘ഓം’ എന്ന ചിത്രത്തിനായി ആവേശത്തോടെ കാത്തിരിക്കുകയാണ് സിനിമാപ്രേമികൾ. ചിത്രത്തിന്റെ പ്രൊമോഷൻ പരിപാടികളിൽ ഇരുതാരങ്ങളും സജീവമാണ്. ഇപ്പോഴിതാ ഹൈദരാബാദിൽ നടന്ന പ്രൊമോഷൻ പരിപാടിക്കിടെ ധനുഷ് മമ്മൂട്ടിയോട് നടത്തിയ രസകരമായ അഭ്യർഥനയാണ് സോഷ്യൽ മീഡിയയിൽ വൈറലാകുന്നത്. മമ്മൂട്ടിയുടെ പ്രായത്തെക്കുറിച്ചായിരുന്നു ധനുഷിന്റെ തമാശ. അടുത്ത തവണ കാണുമ്പോൾ താടിയിൽ കുറച്ചുകൂടി നര വരുത്തണമെന്നായിരുന്നു മമ്മൂട്ടിയോടുള്ള ധനുഷിന്റെ അഭ്യർഥന. അതിന് കാരണവും താരം വ്യക്തമാക്കി.
മമ്മൂട്ടിയെക്കാൾ പ്രായം തോന്നിക്കുന്നത് ധനുഷിനാണെന്നും ഇരുവരെയും കണ്ടാൽ ധനുഷാണ് ചേട്ടനെന്ന് പലരും പറയുന്നുണ്ടെന്നുമായിരുന്നു താരത്തിന്റെ തമാശ. അടുത്ത തവണ വരുമ്പോൾ താടിയിൽ അവിടെയും ഇവിടെയുമായി കുറച്ച് നരപ്പിച്ചാൽ തനിക്ക് അൽപമെങ്കിലും ചെറുപ്പമായി തോന്നുമല്ലോ എന്നായിരുന്നു ധനുഷിന്റെ ചോദ്യം. ഇത് കേട്ട് മമ്മൂട്ടിയും പൊട്ടിച്ചിരിച്ചു. ചിത്രത്തിൽ മമ്മൂട്ടിയെ തന്നെ അഭിനയിപ്പിക്കണമെന്ന് സംവിധായകൻ രാജ്കുമാർ പെരിയസാമിക്ക് നിർബന്ധമുണ്ടായിരുന്നുവെന്നും കഥകൾ തിരഞ്ഞെടുക്കുന്നതിൽ അതീവ ശ്രദ്ധ പുലർത്തുന്ന മമ്മൂട്ടി തങ്ങളുടെ ചിത്രത്തിന്റെ ഭാഗമായതിൽ അഭിമാനമുണ്ടെന്നും ധനുഷ് പറഞ്ഞു.
രാജ്കുമാർ പെരിയസാമി സംവിധാനം ചെയ്യുന്ന ചിത്രത്തിൽ സായ് പല്ലവിയും ശ്രീലീലയുമാണ് നായികമാർ. ‘ഓപ്പറേഷൻ മോൾ’ എന്നാണ് ചിത്രത്തിന്റെ മുഴുവൻ പേര്. നവംബർ 20നാണ് ചിത്രം തിയറ്ററുകളിലെത്തുന്നത്. അതേസമയം, പ്രായത്തെ തോൽപ്പിക്കുന്ന മമ്മൂട്ടിയുടെ ലുക്കിനെക്കുറിച്ചുള്ള ധനുഷിന്റെ തമാശ ആരാധകരും ഏറ്റെടുത്തുകഴിഞ്ഞു.



