ഇൻഡ്യൻ പ്രീമിയർ ലീഗ് 2027 സീസണിന് മുന്നോടിയായി ടീമുകളായ ചെന്നൈ സൂപ്പര്‍ കിങ്‌സും സണ്‍റൈസേഴ്‌സ് ഹൈദരാബാദും തമ്മില്‍ നാല് കളിക്കാരെ പരസ്പരം കൈമാറി. ഇംഗ്ലണ്ട് ഓള്‍റൗണ്ടര്‍ ലിയാം ലിവിങ്സ്റ്റണും ഓസ്ട്രേലിയന്‍ സീം ബൗളിങ് ഓള്‍റൗണ്ടര്‍ ജാക്ക് എഡ്വേര്‍ഡ്‌സും ചെന്നൈയിലേക്ക് ചേക്കേറിയപ്പോള്‍, ഇടങ്കയ്യന്‍ പേസര്‍ ഖലീല്‍ അഹമ്മദും ഓസ്ട്രേലിയന്‍ ഫാസ്റ്റ് ബൗളര്‍ നഥാന്‍ എലിസും ഹൈദരാബാദ് ഫ്രാഞ്ചൈസിയുടെ ഭാഗമായി. ഐപിഎല്‍ 2026 സീസണിന് മുന്നോടിയായി 13 കോടി രൂപയ്ക്ക് എസ്ആര്‍എച്ച് സ്വന്തമാക്കിയ ലിവിങ്സ്റ്റണ്‍, പുതുക്കിയ 6 കോടി രൂപ പ്രതിഫലത്തിലാണ് സിഎസ്‌കെയില്‍ ചേരുന്നത്. 3 കോടി രൂപയ്ക്ക് എസ്ആര്‍എച്ച് കരാറിലെടുത്ത എഡ്വേര്‍ഡ്‌സ്, നിലവിലെ അതേ കരാര്‍ തുകയില്‍ ചെന്നൈയിലേക്ക് മാറും.
പകരമായി, ഖലീല്‍ (4.8 കോടി രൂപ), എലിസ് (2 കോടി രൂപ) എന്നിവരെ നിലവിലെ അതേ പ്രതിഫലത്തുകയില്‍ എസ്ആര്‍എച്ച് തങ്ങളുടെ ടീമിലെത്തിച്ചു. വരാനിരിക്കുന്ന സീസണിന് മുന്നോടിയായി തങ്ങളുടെ സ്‌ക്വാഡുകളില്‍ ആവശ്യമായ മാറ്റങ്ങള്‍ വരുത്താന്‍ ഈ ട്രേഡിലൂടെ ഇരു ഫ്രാഞ്ചൈസികള്‍ക്കും സാധിക്കും. സിഎസ്‌കെ കൂടുതല്‍ ഓള്‍റൗണ്ട് ഓപ്ഷനുകള്‍ നിരയിലെത്തിച്ചപ്പോള്‍, എസ്ആര്‍എച്ച് തങ്ങളുടെ ഫാസ്റ്റ് ബൗളിംഗ് ശക്തിപ്പെടുത്തുകയാണ് ചെയ്തത്. ഓസ്ട്രേലിയക്കായി അന്താരാഷ്ട്ര അരങ്ങേറ്റം കുറിക്കുന്നതിന് മുമ്പ് എസ്ആര്‍എച്ച് കരാറിലെടുത്ത എഡ്വേര്‍ഡ്‌സിന്, പാദത്തിനേറ്റ പരിക്ക് കാരണം ഐപിഎല്‍ 2026 സീസണ്‍ മുഴുവനായി നഷ്ടമായിരുന്നു.
അതേസമയം, 2018 നും 2021 നും ഇടയില്‍ ടീമിന്റെ ഭാഗമായിരുന്ന ഖലീല്‍ അഹമ്മദ് വീണ്ടും എസ്ആര്‍എച്ചിലേക്ക് മടങ്ങിയെത്തുകയാണ്. ഐപിഎല്‍ 2025-ല്‍ സിഎസ്‌കെയ്ക്കായി 14 മത്സരങ്ങളില്‍ നിന്ന് 15 വിക്കറ്റുകള്‍ ഈ ഇടങ്കയ്യന്‍ പേസര്‍ വീഴ്ത്തിയിരുന്നുവെങ്കിലും, 2026 സീസണില്‍ തുടയിലെ പേശികള്‍ക്കേറ്റ പരിക്കിനെ തുടര്‍ന്ന് വെറും 5 മത്സരങ്ങളില്‍ മാത്രമാണ് കളിക്കാനായത്. ഡെത്ത് ഓവറുകളിലെ തന്ത്രങ്ങള്‍ക്കും വൈവിധ്യങ്ങള്‍ക്കും പേര് കേട്ട എലിസ്, എസ്ആര്‍എച്ചിന്റെ ഫാസ്റ്റ് ബൗളിംഗ് നിരയ്ക്ക് കൂടുതല്‍ ആഴം നല്‍കും.
ഐപിഎല്‍ 2026-ല്‍ ഇരു ടീമുകളുടെയും വ്യത്യസ്തമായ പ്രകടനങ്ങള്‍ക്ക് ശേഷമാണ് ഈ കൈമാറ്റം നടക്കുന്നത്. ലീഗ് ഘട്ടത്തില്‍ ഒന്‍പത് ജയവും അഞ്ച് തോല്‍വിയുമായി 18 പോയിന്റോടെ മൂന്നാം സ്ഥാനത്ത് ഫിനിഷ് ചെയ്ത എസ്ആര്‍എച്ച്, എലിമിനേറ്ററില്‍ രാജസ്ഥാന്‍ റോയല്‍സിനോട് പരാജയപ്പെടുകയായിരുന്നു. മറുഭാഗത്ത്, 12 പോയിന്റോടെ എട്ടാം സ്ഥാനത്ത് ഫിനിഷ് ചെയ്ത് പ്ലേഓഫ് കാണാതെ പുറത്തായ ചെന്നൈ സൂപ്പര്‍ കിംഗ്‌സിന് നിരാശാജനകമായ സീസണായിരുന്നു അത്. ഐപിഎല്‍ 2027-ന് മുന്നോടിയായി അഞ്ച് തവണ ചാമ്പ്യന്മാരായ ചെന്നൈ തങ്ങളുടെ പരിശീലക നിരയിലും വലിയ മാറ്റങ്ങള്‍ വരുത്തിയിട്ടുണ്ട്. ദീര്‍ഘകാലം പരിശീലകനായിരുന്ന സ്റ്റീഫന്‍ ഫ്‌ളെമിംഗിന് പകരം മുന്‍ ഇന്ത്യന്‍ പേസര്‍ സഹീര്‍ ഖാന്‍ ഹെഡ് കോച്ചായി ചുമതലയേറ്റു.
