കോഴിക്കോട്: ഖത്തർ കെ.എം.സി.സി കവർച്ചാ കേസിൽ ബിജെപി പ്രാദേശിക നേതാവ് പരപ്പിൽ ബാലകൃഷ്ണനെ മാപ്പുസാക്ഷിയാക്കാൻ അന്വേഷണസംഘം കോടതിയെ സമീപിച്ചു. കൊയിലാണ്ടി ഫസ്റ്റ് ക്ലാസ് ജുഡീഷ്യൽ മജിസ്ട്രേറ്റ് കോടതിയിലാണ് പോലീസ് അപേക്ഷ സമർപ്പിച്ചത്. കോടതിയുടെ അനുമതി ലഭിച്ചാൽ ബാലകൃഷ്ണന്റെ രഹസ്യമൊഴി രേഖപ്പെടുത്തും.
വെൽഡിങ് ജോലി വാഗ്ദാനം ചെയ്ത് തന്നെ വിളിച്ചുകൊണ്ടുപോയി തെറ്റിദ്ധരിപ്പിച്ചെന്നും പിന്നീട് ഭീഷണിപ്പെടുത്തി കെ.എം.സി.സിയുടെ സ്ട്രോങ് റൂം തുറപ്പിച്ചെന്നുമാണ് ബാലകൃഷ്ണൻ അന്വേഷണസംഘത്തിന് നൽകിയ മൊഴി. കേസിൽ നിർണായക വിവരങ്ങൾ നൽകാൻ കഴിയുന്നയാളെന്ന നിലയിലാണ് ബാലകൃഷ്ണനെ മാപ്പുസാക്ഷിയാക്കാനുള്ള നീക്കം.
കെ.എം.സി.സി ഓഫീസിലെ ജീവനക്കാരനെ കെട്ടിയിട്ട ശേഷം സ്ട്രോങ് റൂം തകർത്ത് എട്ട് കോടി രൂപ കവർന്നെന്നാണ് കേസ്. പയ്യോളി സ്വദേശിയായ ‘ബോംബെ ഷാജി’ എന്ന ഷാജഹാനാണ് കേസിലെ ഒന്നാം പ്രതി. ബാലകൃഷ്ണന്റെ മൊഴി കേസിന്റെ അന്വേഷണത്തിലും തുടർനടപടികളിലും നിർണായകമായേക്കും.
