എറണാകുളം: സമരത്തിൽ പങ്കെടുത്ത വിദ്യാർഥികൾക്ക് പരീക്ഷ എഴുതാൻ അനുമതി നൽകിയ ഹൈക്കോടതി സിംഗിൾ ബെഞ്ച് വിധിക്കെതിരെ കാലടി ശ്രീശങ്കരാചാര്യ സംസ്കൃത സർവകലാശാല വൈസ് ചാൻസലർ സി.സി. തോമസ് അപ്പീൽ നൽകി. വിദ്യാർഥികളെ പരീക്ഷ എഴുതാൻ അനുവദിക്കണമെന്ന കോടതി നിർദേശത്തിന് പിന്നാലെയാണ് അപ്പീൽ നടപടി.
അതേസമയം, വൈസ് ചാൻസലറെ വിദ്യാർഥികൾ കയ്യേറ്റം ചെയ്തതിന് തെളിവില്ലെന്നാണ് സർവകലാശാല അച്ചടക്ക സമിതി അംഗം ഡോ. കെ.എസ്. ജിനിതയുടെ റിപ്പോർട്ടിലുള്ളതെന്ന് എസ്എഫ്ഐ അവകാശപ്പെട്ടു. വിദ്യാർഥികളെ പുറത്താക്കാൻ കാരണമായ പരാതിക്ക് പിന്നിൽ ഗൂഢാലോചനയുണ്ടെന്നാണ് സംഘടനയുടെ ആരോപണം. സമരം അവസാനിച്ച സമയത്ത് വൈസ് ചാൻസലർക്ക് പരാതിയുണ്ടായിരുന്നില്ലെന്നും പിന്നീട് ഗവർണറുടെയും വൈസ് ചാൻസലറുടെയും ഉന്നതവിദ്യാഭ്യാസ മന്ത്രിയുടെയും ഇടപെടലിനെ തുടർന്നാണ് പരാതി ഉയർന്നതെന്നും എസ്എഫ്ഐ ആരോപിച്ചു.
സസ്പെൻഷൻ പിൻവലിക്കണമെന്നും പരീക്ഷ എഴുതാൻ അനുവദിക്കണമെന്നും ആവശ്യപ്പെട്ട് വിദ്യാർഥികൾ നിരാഹാര സമരത്തിന് ഒരുങ്ങുകയാണ്. കോടതി അനുമതി നൽകിയിട്ടും പരീക്ഷാ ഫീസ് അടയ്ക്കുന്നതിനായി സർവകലാശാല വെബ്സൈറ്റ് തുറന്നുനൽകുന്നില്ലെന്നും വിദ്യാർഥികൾ ആരോപിച്ചു. വിദ്യാർഥികളുടെ ഭാവി സംബന്ധിച്ച ആശങ്കയും അവർ ഉന്നയിച്ചിട്ടുണ്ട്.
