ഇന്ത്യൻ നാടൻ സംഗീതത്തിന്റെ താളപ്പെരുക്കവുമായി എത്താൻ ഒരുങ്ങി റോക്ക്‌സ്റ്റാർ ദേവി ശ്രീ പ്രസാദ്. നായകനായി അരങ്ങേറ്റം കുറിക്കുന്ന ‘യെല്ലമ്മ’ എന്ന ചിത്രത്തിന്റെ ടൈറ്റിൽ സോങ് റെക്കോർഡിങ് പൂർത്തിയായി. ഇന്ത്യയുടെ വിവിധ ഭാഗങ്ങളിൽ നിന്നുള്ള നൂറ് പരമ്പരാഗത താളവാദ്യ കലാകാരന്മാരെ ഒരുമിച്ചണിനിരത്തിയാണ് ഈ ഗാനം ഒരുക്കിയിരിക്കുന്നത്. ഗാനത്തിന്റെ റിലീസ് ഉടൻ ഉണ്ടാകുമെന്നാണ് അണിയറപ്രവർത്തകർ അറിയിച്ചിരിക്കുന്നത്.വ്യത്യസ്ത നാടൻ സംഗീതശൈലികളും താളങ്ങളും ഒരുമിക്കുന്ന ഈ ഗാനം ചിത്രത്തിന്റെ പ്രധാന ആകർഷണങ്ങളിലൊന്നാകുമെന്നാണ് പ്രതീക്ഷ. നൂറ് കലാകാരന്മാരുടെ സംഗീതമികവ് ഒരൊറ്റ ഗാനത്തിൽ കോർത്തിണക്കിയിരിക്കുന്നത് തന്നെ വലിയ പ്രത്യേകതയാണ്.

ഗാനത്തിന്റെ റെക്കോർഡിങ് വിശേഷങ്ങൾ പുറത്തുവന്നതോടെ ആരാധകർക്കിടയിലും വലിയ ആകാംക്ഷയാണ്.സംഗീതസംവിധായകനെന്ന നിലയിൽ നിരവധി ഹിറ്റ് ഗാനങ്ങൾ സമ്മാനിച്ച ദേവി ശ്രീ പ്രസാദ് ആദ്യമായി നായകനായി എത്തുന്നു എന്നതാണ് ‘യെല്ലമ്മ’യുടെ മറ്റൊരു പ്രത്യേകത. ‘ബലഗം’ എന്ന ചിത്രത്തിലൂടെ ശ്രദ്ധേയനായ വേണു യെൽദണ്ടിയാണ് സിനിമ സംവിധാനം ചെയ്യുന്നത്. ദിൽ രാജു അവതരിപ്പിക്കുന്ന ചിത്രം ശ്രീ വെങ്കിടേശ്വര ക്രിയേഷൻസിന്റെ ബാനറിൽ ഷിരീഷ് നിർമ്മിക്കുന്നു.അഞ്ച് ഭാഷകളിലായാണ് ചിത്രം പ്രേക്ഷകരിലേക്ക് എത്തുന്നത്. തെലുങ്ക്, തമിഴ്, മലയാളം, കന്നഡ, ഹിന്ദി ഭാഷകളിൽ ഒരുങ്ങുന്ന സിനിമയുടെ ആഗോള റിലീസ് 2027 മാർച്ച് 5നാണ് നിശ്ചയിച്ചിരിക്കുന്നത്. നിലവിൽ ചിത്രീകരണം പുരോഗമിക്കുകയാണ്.ദേവി ശ്രീ പ്രസാദിന്റെ അഭിനയ അരങ്ങേറ്റവും നൂറ് നാടൻ കലാകാരന്മാർ അണിനിരക്കുന്ന സംഗീതാവിഷ്കാരവും ഒരുമിക്കുമ്പോൾ ‘യെല്ലമ്മ’ പ്രേക്ഷകർക്ക് പുതിയൊരു സിനിമാനുഭവമാകുമോ എന്നാണ് ഇനി അറിയേണ്ടത്. ടൈറ്റിൽ സോങിന്റെ റിലീസിനായി കാത്തിരിക്കുകയാണ് ആരാധകർ.