ന്യൂഡൽഹി: മുൻ പഞ്ചാബ് മുഖ്യമന്ത്രി ബിയാന്ത് സിങ്ങിനെ വധിച്ച കേസിൽ ജീവപര്യന്തം തടവുശിക്ഷ അനുഭവിക്കുന്ന ബബ്ബർ ഖൽസ ഭീകരൻ ജഗ്താർ സിങ് ഹവാരയുടെ ജയിൽമാറ്റ ഹർജി സുപ്രീംകോടതി മാറ്റിവച്ചു. ഡൽഹിയിലെ തിഹാർ ജയിലിൽ നിന്ന് പഞ്ചാബിലെ ജയിലിലേക്ക് മാറ്റണമെന്ന ഹർജിയാണ് 2027 ഫെബ്രുവരിക്ക് ശേഷം പരിഗണിക്കാൻ മാറ്റിയത്. അടുത്ത വർഷം പഞ്ചാബിൽ നടക്കാനിരിക്കുന്ന നിയമസഭാ തിരഞ്ഞെടുപ്പിൽ ഹവാരയുടെ ജയിൽമാറ്റം വലിയ സ്വാധീനം ചെലുത്തുമെന്ന ഇന്റലിജൻസ് ബ്യൂറോയുടെ റിപ്പോർട്ടാണ് കോടതിയുടെ തീരുമാനത്തിന് പിന്നിൽ.
ജസ്റ്റിസുമാരായ എം.എം. സുന്ദരേഷ്, പി.ബി. വരാലെ എന്നിവരടങ്ങിയ ബെഞ്ചാണ് ഹർജി പരിഗണിച്ചത്. സാധാരണ നിലയിൽ ഹർജി പരിഗണിക്കുന്നതിൽ തടസ്സമില്ലെങ്കിലും ഇന്റലിജൻസ് ഏജൻസി നൽകിയ റിപ്പോർട്ട് ഗൗരവമുള്ളതാണെന്ന് കോടതി നിരീക്ഷിച്ചു. തിരഞ്ഞെടുപ്പ് സാഹചര്യം നിലനിൽക്കുന്നതിനാൽ വിഷയം ഇപ്പോൾ പരിഗണിക്കുന്നത് ഉചിതമല്ലെന്നും കോടതി വ്യക്തമാക്കി.
90 വയസ്സുള്ള മാതാവും കുടുംബവും പഞ്ചാബിലാണെന്നും അവരെ കാണാൻ പഞ്ചാബിലെ ജയിലിലേക്ക് മാറ്റണമെന്നുമാണ് ഹവാരയുടെ ആവശ്യം. മാതാവിന്റെ പ്രായം കണക്കിലെടുത്ത് പരോൾ അനുവദിക്കണമെന്നും ഹർജിയിൽ ആവശ്യപ്പെട്ടിട്ടുണ്ട്. ഹവാരയുടെ അഭിഭാഷകൻ എസ്. മുരളീധർ തിരഞ്ഞെടുപ്പാണ് തടസ്സമെങ്കിൽ ഹർജി മൂന്ന് മാസത്തേക്ക് മാറ്റിവയ്ക്കാമെന്ന് കോടതിയിൽ നിർദേശിച്ചു. ഇതോടെയാണ് തിരഞ്ഞെടുപ്പ് കഴിഞ്ഞ് ഹർജി പരിഗണിക്കാൻ കോടതി തീരുമാനിച്ചത്.
ഹവാരയെ പഞ്ചാബിലെ ജയിലിലേക്ക് മാറ്റുന്നതിൽ പഞ്ചാബ്, ഡൽഹി സർക്കാരുകളും ചണ്ഡിഗഢ് ഭരണകൂടവും നേരത്തെ എതിർപ്പ് അറിയിച്ചിരുന്നു. ഇതിന്റെ പശ്ചാത്തലത്തിലാണ് ഇന്റലിജൻസ് ബ്യൂറോയുടെ അഭിപ്രായം തേടാൻ കോടതി കേന്ദ്ര സർക്കാരിനോട് നിർദേശിച്ചത്.
1995 ഓഗസ്റ്റ് 31ന് ചണ്ഡിഗഢിലെ സിവിൽ സെക്രട്ടേറിയറ്റിന് പുറത്ത് നടന്ന ബോംബ് സ്ഫോടനത്തിലാണ് അന്നത്തെ മുഖ്യമന്ത്രി ബിയാന്ത് സിങ്ങും മറ്റ് 16 പേരും കൊല്ലപ്പെട്ടത്. കേസിൽ ഹവാരയ്ക്ക് വധശിക്ഷ വിധിച്ചിരുന്നെങ്കിലും 2010ൽ പഞ്ചാബ്-ഹരിയാന ഹൈക്കോടതി ശിക്ഷ ജീവപര്യന്തമായി കുറച്ചു. ജീവിതകാലം മുഴുവൻ ജയിലിൽ കഴിയണമെന്നായിരുന്നു ഉത്തരവ്. ഇതിനെതിരായ അപ്പീൽ സുപ്രീംകോടതിയിൽ നിലവിലുണ്ട്.
2004ൽ ചണ്ഡിഗഢിലെ ബുറൈൽ ജയിലിൽ തുരങ്കം നിർമിച്ച് രക്ഷപ്പെട്ട സംഭവത്തിലും ഹവാര ഉൾപ്പെട്ടിരുന്നു. ആറ് കേസുകളിൽ ശിക്ഷിക്കപ്പെട്ടിട്ടുണ്ടെന്നാണ് കേന്ദ്ര സർക്കാർ കോടതിയെ അറിയിച്ചത്. അതേസമയം, മാനുഷിക പരിഗണനയുടെ അടിസ്ഥാനത്തിൽ ഹവാരയ്ക്ക് പത്ത് ദിവസത്തെ പരോൾ അനുവദിക്കണമെന്ന് പഞ്ചാബ് മുഖ്യമന്ത്രി ഭഗവന്ത് മാൻ ഗവർണർക്ക് കത്തയച്ചിരുന്നു.
ഹവാരയുടെ ജയിൽമാറ്റം സംബന്ധിച്ച ഹർജി 2027 ഫെബ്രുവരിക്ക് ശേഷം സുപ്രീംകോടതി വീണ്ടും പരിഗണിക്കും.
