മുംബൈ: ഇന്ത്യൻ സൂപ്പർ ലീഗിന്റെ പുതിയ സീസണിൽ ആദ്യ പരിശീലക മാറ്റം. മുംബൈ സിറ്റി എഫ്‌സി പരിശീലകൻ മനോലോ മാർക്വസ് ക്ലബ്ബ് വിട്ടു. പരസ്പര ധാരണയോടെയാണ് വേർപിരിയുന്നതെന്ന് ക്ലബ്ബ് ഔദ്യോഗികമായി അറിയിച്ചു. ഈ സീസണിൽ ഐഎസ്എല്ലിൽ ഒരു ക്ലബ്ബ് പരിശീലകനെ മാറ്റുന്നത് ആദ്യമായാണ്.
കഴിഞ്ഞ ഞായറാഴ്ച എസ്‌സി ഡൽഹിക്കെതിരായ മത്സരത്തിൽ 2-0ന് മുന്നിട്ടുനിന്ന ശേഷമാണ് മുംബൈ സിറ്റി 2-3ന് തോൽവി വഴങ്ങിയത്. സ്വന്തം തട്ടകത്തിൽ നടന്ന ആദ്യ മത്സരത്തിലെ തോൽവിയും ടീമിന്റെ മോശം തുടക്കവും മാർക്വസിന് തിരിച്ചടിയായി. മത്സരശേഷം നിരാശയോടെ മൈതാനം വിട്ട അദ്ദേഹത്തിന്റെ പരിശീലക സ്ഥാനവും അധികം വൈകാതെ അവസാനിച്ചു.
സീസണിന്റെ തുടക്കം മുതൽ തന്നെ താരങ്ങളെ ടീമിലെത്തിക്കുന്നതുമായി ബന്ധപ്പെട്ട് മാർക്വസും ക്ലബ്ബ് മാനേജ്‌മെന്റും തമ്മിൽ അഭിപ്രായവ്യത്യാസങ്ങളുണ്ടായിരുന്നതായാണ് റിപ്പോർട്ടുകൾ. ടീമിന്റെ ആവശ്യത്തിനനുസരിച്ചുള്ള താരങ്ങളെ സ്വന്തമാക്കാൻ കഴിയാത്തതിൽ പരിശീലകന് അതൃപ്തിയുണ്ടായിരുന്നു. ഞായറാഴ്ചത്തെ മത്സരത്തിന് ശേഷമുള്ള വാർത്താസമ്മേളനത്തിലും ക്ലബ്ബ് പരിശീലകനെ മാറ്റാൻ തീരുമാനിച്ചാൽ അതിന് കഴിയുമെന്ന് മാർക്വസ് പ്രതികരിച്ചിരുന്നു.
ഈ സീസണിൽ ഇതുവരെ കളിച്ച നാല് മത്സരങ്ങളിൽ രണ്ടെണ്ണത്തിൽ തോൽക്കുകയും രണ്ടെണ്ണം സമനിലയിൽ അവസാനിപ്പിക്കുകയും ചെയ്ത മുംബൈ സിറ്റിക്ക് മികച്ച പ്രകടനം പുറത്തെടുക്കാൻ കഴിഞ്ഞിരുന്നില്ല. എസ്‌സി ഡൽഹിക്കെതിരായ മത്സരത്തിൽ പരിക്കുമൂലം വിക്രം പ്രതാപ് സിങ്ങും വിൽമർ ജോർദാൻ ഗിലും പുറത്തിരുന്നത് ടീമിന്റെ മുന്നേറ്റനിരയെ ബാധിച്ചു. പരിചയസമ്പന്നരായ താരങ്ങളുടെ അഭാവത്തിൽ ഇറങ്ങിയ മുന്നേറ്റനിരയ്ക്ക് ലഭിച്ച അവസരങ്ങൾ മുതലാക്കാനും കഴിഞ്ഞില്ല.
ടീമിന്റെ താരസമാഹരണ നയത്തെക്കുറിച്ചുള്ള ചോദ്യത്തിന്, അതിന് മറുപടി പറയേണ്ടയാൾ താനല്ലെന്നായിരുന്നു മാർക്വസിന്റെ പ്രതികരണം. ലോകമെമ്പാടുമുള്ള ഫുട്ബോളിൽ പണമില്ലെന്ന് പറയുന്ന ക്ലബ്ബുകൾ പുതിയ പരിശീലകനെ നിയമിക്കുകയും പിന്നീട് താരങ്ങളെ സ്വന്തമാക്കുകയും ചെയ്യുന്ന സാഹചര്യമുണ്ടെന്നും അദ്ദേഹം പരോക്ഷമായി വിമർശിച്ചിരുന്നു.
മുംബൈ സിറ്റിയുടെ ഫുട്ബോൾ ഡയറക്ടർ സുജയ് ശർമ പ്രസ്താവനയിലൂടെയാണ് വേർപിരിയൽ പ്രഖ്യാപിച്ചത്. ഇന്ത്യൻ ഫുട്ബോളിന്റെ പുതിയ കാലഘട്ടത്തിലേക്കുള്ള മാറ്റത്തിനിടയിലാണ് ക്ലബ്ബ് മുന്നോട്ടുപോകുന്നതെന്നും ഇന്ത്യൻ ഫുട്ബോളിലെ അനുഭവസമ്പത്തും മുൻകാല നേട്ടങ്ങളും പരിഗണിച്ചാണ് മാർക്വസിനെ ടീമിലെത്തിച്ചതെന്നും അദ്ദേഹം വ്യക്തമാക്കി. നിലവിലെ സീസണിലെ ലക്ഷ്യങ്ങൾ കൈവരിക്കുന്നതിനായി ആദ്യ ടീമിനെ പിന്തുണയ്ക്കുന്നതിലാണ് ഇനി ശ്രദ്ധയെന്നും അദ്ദേഹം കൂട്ടിച്ചേർത്തു.
ഇന്ത്യൻ ഫുട്ബോളിൽ മികച്ച നേട്ടങ്ങളോടെയായിരുന്നു 58കാരനായ സ്പാനിഷ് പരിശീലകന്റെ തുടക്കം. 2021-22 സീസണിൽ ഹൈദരാബാദ് എഫ്‌സിയെ ഐഎസ്എൽ കിരീടത്തിലേക്ക് നയിച്ച അദ്ദേഹം പിന്നീട് എഫ്‌സി ഗോവയ്ക്കൊപ്പം 2025ലെ സൂപ്പർ കപ്പ് കിരീടവും സ്വന്തമാക്കി. എന്നാൽ മുംബൈ സിറ്റിയിലെത്തിയതോടെ ക്ലബ്ബുമായുള്ള ബന്ധം ക്രമേണ വഷളാവുകയായിരുന്നു. ഇപ്പോൾ പരസ്പര ധാരണയോടെയുള്ള പിന്മാറ്റത്തോടെ ഇന്ത്യൻ ഫുട്ബോളിലെ അദ്ദേഹത്തിന്റെ പുതിയ അധ്യായത്തിന് താൽക്കാലിക വിരാമമായിരിക്കുകയാണ്.
