കോഴിക്കോട്: കേരള സ്കൂൾ കായികമേളയിൽ പ്രായത്തട്ടിപ്പോ ഉത്തേജകമരുന്ന് ഉപയോഗമോ സംബന്ധിച്ച് പരാതികൾ ഉയർന്നാൽ കർശന നടപടി സ്വീകരിക്കുമെന്ന് വിദ്യാഭ്യാസമന്ത്രി എൻ. ഷംസുദ്ദീൻ. ആവശ്യമെങ്കിൽ ബോൺ ടെസ്റ്റ് നടത്തുമെന്നും മന്ത്രി മുന്നറിയിപ്പ് നൽകി. പരാതികൾ പരിശോധിച്ച് നടപടിയെടുക്കുമെന്നും അച്ചടക്കരാഹിത്യം അനുവദിക്കില്ലെന്നും അദ്ദേഹം വ്യക്തമാക്കി.
കായികമേളയ്ക്ക് മഴ വെല്ലുവിളിയാകില്ലെന്നാണ് പ്രതീക്ഷയെന്ന് മന്ത്രി പറഞ്ഞു. മത്സരങ്ങൾ ആരംഭിക്കുമ്പോഴേക്കും കാലാവസ്ഥ തെളിയുമെന്നാണ് പ്രതീക്ഷ. മേള മികച്ച രീതിയിൽ നടത്തുന്നതിനുള്ള ഒരുക്കങ്ങൾ പൂർത്തിയാക്കിയിട്ടുണ്ട്. പോരായ്മകളുണ്ടാകാതിരിക്കാൻ എല്ലാ കാര്യങ്ങളും പരിശോധിച്ച് ഉറപ്പുവരുത്തിയിട്ടുണ്ട്. എൻഐടി ഗ്രൗണ്ടും ട്രാക്കും ലഭിച്ചത് വലിയ അനുഗ്രഹമാണെന്നും മന്ത്രി കൂട്ടിച്ചേർത്തു.
അറുപത്തിയെട്ടാമത് കേരള സ്കൂൾ കായികമേളയ്ക്ക് ഇന്ന് കോഴിക്കോട് തുടക്കമാകും. വൈകിട്ട് നാലിന് മുഖ്യമന്ത്രി വി.ഡി. സതീശൻ മേള ഉദ്ഘാടനം ചെയ്യും. ഇന്ത്യൻ ഒളിമ്പിക് അസോസിയേഷൻ പ്രസിഡന്റ് പി.ടി. ഉഷ ദീപശിഖ തെളിയിക്കും.
